La convocatoria del Sindicatu Vivienda d’Asturies aconceyó alrodiu’l millar de persones en Xixón
El Sindicatu Vivienda d’Asturies en Xixón defínese como “una ferramienta independiente y útil de la clas trabayadora pa enfrentase al problema la vivienda”, siendo esta la so primer acción pública pa denunciar el grave problema d’accesu a la vivienda que tienen los asturianos, un problema que la precariedá llaboral qu’Asturies arrastra va décades lleva tiempu afalando pero qu’agora, cola xentrificación, turistificación y especulación ta algamando niveles incaltenibles. Nesti primer manifestamientu desixóse la intervención de los gobiernos pa torgar qu’un drechu tan básicu comu la vivienda seya oxetu d’especulación y negociu.
La carestía de la vida y los baxos salarios faen ques seya necesario invertir una media d’un 43% del salariu pa pagar el costu d’un llugar onde vivir, superando esos porcentaxes nos sueldos más baxos y algamando más del 100% -ello ye, lo imposible- pente perceutores de sosidios, pensiones o salarios sociales.
Entantu, los estremaos Gobiernos dexen a los y les trabayadores en manes de fondos buitres y rentistes ensin escrúpulos, qu’ amasen fortunes, provoquen desahucios y espulsen a la xente de los sos barrios, xentrificando les poblaciones y poniéndoles al serviciu de los sos intereses económicos y del negociu’l turismu.
Nel Dos Santos
This work is licensed under a Creative Commons Attribution 4.0 International License.
