Bonos díes, bona xente.
Alborecemos con nubosidá media-alta ya con unes temperatures que tan alrodiu de los 8ºC, rexistrándose nel puirtu Payares 1,3ºC.
Güei vamos tener el cielu empuercáu de nubes medies y altes pero sin más consecuencies, cola apertura de dellos claros pela tarde. Les temperatures van caltenese parecíes a les d’ayeri y l’aire sedrá sele ya variable.
Mañana miércoles volveremos a tener un día mui seliquino con dalgo de nubosidá media-alta nel cielu ya con unes temperatures másimes que tienden a subir, amás l’aire seguirá siendo sele ya variable.
El xueves pasaremos de nuevu calor a partir del mediudía con un nuevu ascensu de les temperatures másimes, col aire ábrigu, n’esti casu sedrá sele ya con más ratos de sol, a pesar de tener dalgo de nubosidá media-alta.
El vienres algamaremos yá los 20ºC a primera hora de la tarde y nel cielu seguiremos teniendo dalgo de nubosidá alta que nun impedirá que los rayinos de sol calezcan l’ambiente abondu con vientu sele ya variable pero con predominiu de la componente sur.
El sábadu seguiremos con esti tiempu seliquino y el domingu pue lleganos un frente atlánticu a últimes hores pero esto yá lu diremos viendo.
Que paséis un bon martes collacies ya collacios.
Semeya d’un balagar, facina o vara herba que mos l’apurre’l nuesu collaciu Luis Alfredo Hernández
This work is licensed under a Creative Commons Attribution 4.0 International License.
