Mientres trata de vendésenos el turismu comu panacea, cola imaxe de l’Asturies más verdi y curiada, superpónense los proyectos qu’estrocen la redolada y rebaxen la calidá de vida nes zones rurales
Namás nesta selmana conociéronse los proyeutos d’un nuevu parque de bateríes na Arquiella, Perlora, nel conceyu Carreño, y d’una planta de xestión de borrafes de la construcción, na cantera Rencaños, nel pueblu de Busmasgarlín, conceyu de Navia, a menos de 105 metros de les viviendes de la llocalidá. Mentantu, sigue abierta la guerra pa frenar el proyectu d’investigación minera en Peñamayor y los vecinos de Salave ven con congoxa como la minera Black Dragon avanza posiciones, ensin que los parques eólicos frenaren el so acosu en distintos puntos del país.
El parque de bateríes proxectáu n’Arquidiella atópase cercanu a viviendes, igual que los 56 que se conocen de los 170 proyectos de parques de bateries en procesu, toos ellos en zones rurales, al par de llugares habitaos, en llugar d’instalase -como se prometió- en zones industriales, col consiguiente impactu sobro la calidá de vida de los vecinos, los riesgos y la contaminación electromagnética, aparte del dañu natural y paisaxísticu.
Tocantes a la planta de xestión de borrafes de la construcción, na cantera Rencaños, nel pueblu de Busmasgarlín, conceyu de Navia, preténdese una planta de valorización de residuos de construcción y baltadera (RCD), con una capacidá máxima de 100.000 tonelaes, que sedría la 3ª planta del Occidente, tres les de Salas y de Coaña, lo que supon una capacidá bien perriba a la producción actual de residuos asturiana, polo quenamás tienen xacíu pa importar borrafes, convirtiéndonos nun basureru ayenu, ensin que se prevean midíes pa evitar la dispersión de polvu y amenorgar el so impactu acústicu na redolada nin pa controlar los arramaos al ríu Frejulfe, amás del impactu del tráficu de los camiones.
Nel Dos Santos
This work is licensed under a Creative Commons Attribution 4.0 International License.
