Más d’un centenar de persones asistio ayeri a la concentración frente a la Xunta Xeneral contra les males práctiques ambientales del Gobiernu de Asturies en cuestión de xestión de borrafes empobinada a la incineración, arramaos tóxicos y contaminación del aire y acústica, coles graves consecuencies qu’estes práctiques xeneren pa la salú, el mediu ambiente y les comunidaes afectaes
Mientres la concentración les dos organizaciones convocantes, la Plataforma Ciudadana Contra la Quema de Basoria/CSR en Mieres y la Plataforma contra les Borrafes Tóxiques en Llangréu, lleeron dos comunicaos nos qu’amosaron el so refugu a la quema de miles de tonelaes de borrafes derivaes de basoria na central térmica de La Pereda y el depósitu de les sos povises tóxiques na escombrera de Llangréu, denunciando la esistencia d’intereses personales y partidistes de les persones implicaes na xestión d’esta tema que pasen percima del bien común, del mediu ambiente y de la calidá de vida de los vecinos, non yá de les Cuenques Mineres, sinón de tolos conceyos del centru d’Asturies, onde van llegar por acción del vientu los gases y les micropartículas que se van producir nesa combustión.
Dende la Plataforma contra les Borrafes Tóxiques en Llangréu denunciaron l’ecocidiu que ta perpretándose poles distintes alministraciones del Principáu y empreses, “que pretenden sacar un beneficiu puramente económicos del mesmu, camuflando los sos intereses corporativos y personales en polítiques verdis y economía circular. Lo único que furrula de forma circular son les puertes xiratories, de les persones implicaes nesta xestión”.
Tamién dende la Plataforma Ciudadana contra la Quema de Basoria/CSR en Mieres abondaron nesa cuestión, acusando al Principáu de tratar les Cuenques Mineres como “zones de sacrificiu” y actuar en contra de la conocencia científica y de los profesionales sanitarios, qu’alverten de los efectos adversos pa la salú, el mediu ambiente y la mortalidá y morbilidad de la población y de los daños sobro los acuíferos, los animales, les plantes y los cultivos, entrando tamién na cadena alimentaria. “Cabe recordar que según l’Institutu Universitariu d’Oncoloxía del Principáu d’Asturies, les Cuenques Mineres apaecen ya señalaes polos especialistes sanitarios como la zona de mayor significación en cuanto al númberu de casos de cáncanu diagnosticaos” recordó, reclamando “Que faigan menos cuentes utópiques en pos d’un sistema económicu decadente y perxudicial pa la vida, non solo del ser humanu, si non del bioma de nuesa ecorrexón y del planeta”.
Poro los concentraos desixeron el zarru inmediatu y la renaturalización de la Escombrera del Reguerón nel distritu de Lada en Llangréu, aportunando nun cambéu de modelu na xestión de borrafes nel próximu plan autonómicu previstu de magar 2025, que refugue la preparación y quema de Combustible Sólidu Recuperáu (CSR) en La Pereda o en cualesquier otra instalación, apostando por un plan de borrafes encontáu nel amenorgamientu, reutilización y el reciclax, dirixíu escontra la economía circular y la borrafa cero.
L’insoportable nivel de ruiu que carecen dia y nueche los vecinos pol pasu de decenes de camiones, la necesidá de regular les emisiones de bencenu y la necesidá de que’l Conceyu de Llangréu ellabore un Plan Municipal de Borrafes encontáu nes normatives apaecíes nel añu 2022 fueron otres de les cuestiones trataes nes dos intervenciones, que recibieron l’aplausu de los asistentes.
Nel Dos Santos
This work is licensed under a Creative Commons Attribution 4.0 International License.
