Esti añu morrieron n’Asturies cerca del triple de persones que ñacieron, con Pesoz, Yernes y Tameza ya Illano comu los conceyos nos que menos ñacimientos se rexistraron: cero
Les midies pa sacar alantre’l “retu demográficu” asturianu son comu pocu, ineficaces. En tolos conceyos d’Asturies ñacen menos rapacinos que xente muerre, con una cifra de 4.545 ñasciatos nel 2023, el valor más baxu de tola serie hestórica dende entamos del sieglu pasáu, frente a más de 13.000 muertes. Les polítiques d’apoyu a la natalidá nun furrulen y nel 2023 hebio 199 ñacimientos menos que l’anterior, un descensu que se da sobre cifres qu’amenorguen añu a añu va décades.
Los más perxudicaos nesta situación son los conceyos menos poblaos: Yernes y Tameza, con 133 vecinos, Pesoz, con 138 ya Illano, que con 288 ye’l quintu conceyu con menos moraores. Esos son los tres conceyos nos que nun ñació nin una sola persona en tol añu pasáu, ensin que se conozan entá los datos del presente añu.
La emigración forciada de la mocedá, l’ausencia d’unes condiciones de vida minimamente dignes que permitan plantegase la formación d’una familia n’Asturies, l’amenorgamientu del númberu de muyeres n’edá fértil n’Asturies (tamién el más baxu dende que se guarden datos), el retrasu a más de los 32 años de media na edá de nacimientu del primer fíu y la falta de posibilidaes de futuru nes fasteres rurales tan na base d’esta desapaición progresiva del Pueblu Asturianu, cuyes consecuencies trescienden lo económico p’adentrase na perda de tresmisión cultural ya’l riesgu de desapaición de tolo que nos define como pueblu.
Susana Sela
This work is licensed under a Creative Commons Attribution 4.0 International License.
