Bonos díes, bona xente.
Alborecemos col cielu escampláu ya con unes temperatures que tan alrodiu de los 8ºC, anque güei les temperatures son mui irregulares por mor de la iversión térmica, per exemplu na base del Picu Urriellu a más de 1900 m rexistren 7,9ºC, mentantu en Xixón-campus tienen 5,8ºC y nel cabu Peñes tan a 14,4ºC.
Güei vamos tener el cielu poco nubosos o escampláu durante tol día con unes temperatures másimes en moderáu ascensu, algamándose los 20ºC en munches zones d’Asturies, amás l’aire ábrigu sedrá sele en xeneral, sicasí nes zones altes de la cordelera pue soplar con raches moderaes.
Mañana vienres aumentará la nubosidá media-alta que tará entemecía ente dellos claros o abancios con vientu ábrigu durante’l riscar que soplará moderadamente y fadrá que nun baxen les temperatures mínimes, calteniendo un ambiente mui suave durante la nueche. Pel día amenorgará pa quedar sele ya variable pela tarde con unes temperatures másimes que volverán algamar los 20ºC na mayor parte d’Asturies.
El sábadu baxarán de nuevu les temperatures mínimes perdebaxu de los 10ºC ya tendremos intervalos nubosos entemecios ente dellos claros o abancios pel día anque predoninarán les nubes con unes temperatures másimes que descienden llixeramente.
El domingu la prosimidá d’una vaguada atlántica fadrá qu’aumente la intensidá del vientu ábrigu y volvamos a tener temperatures mui suaves nes hores nocturnes. Durante’l día amenorgará dalgo y la llegada d’un frente atlánticu podrá dexar dalguna precipitación na fastera más surocidental d’Asturies pela tarde, nel restu lo más probable ye que quedemos al abellugu de la cordelera y malpenes mos dexe cuatro gotes al finar el día, pero esto yá lu diremos viendo.
Que paséis un bon xueves collacies ya collacios.
Semeya que mos l’apurre la nuesa collacia María Suárez.
This work is licensed under a Creative Commons Attribution 4.0 International License.
