Los convocantes d’esti manifestamientu, que tendrá llugar mañana sábadu 30 payares, a les 12:30 h., saliendo de la estación de Renfe d’Uviéu, acusen a los gobiernos español y europeos de ser cómplices silentes del xenocidiu palestín, “al seguir comerciando, incluso con armes y municiones, con un país que comete crímenes de guerra y xenocidiu”.
El reconocimientu oficial del Estáu de Palestina ye claramente insuficiente pa parar el xenocidiu qu’Israel ta cometiendo en Palestina. Poro, el movimientu de solidaridá con Palestina sigui presionando pa que’l Gobiernu español ponga fin a la so complicidá col Gobiernu israelín y contribuya a frenar la masacre. Dende la Plataforma solidaria Asturies con Palestina, convocantes de l’acción de protesta, desixen tamién que se pongan en marcha les midíes que garanticen la seguridá ya independencia del pueblu palestín.
Pa ello reclamen l’embargu total d’armes a Israel, incluyendo tanto la venta como la compra y el tránsitu d’armamentu pel Estáu español con destín a Israel, que se ponga fin a los contratos del Gobiernu español coles empreses d’armamentu israelines, y que de fechu se rompan tou tipu de rellaciones diplomátiques y comerciales con Israel, poniéndose en marcha una iniciativa política y diplomática pa esparder estes midíes al restu los gobiernos de la Xunión Europea. Al Gobiernu d’Asturies tamién se-y desixe un posicionamientu nidiu, desmarcándose de dicha complicidá, que yá permitió l’asesinatu de decenes de miles de palestines y palestinos, y desixendo al Gobiernu español la puesta en marcha de les midíes enantes mentaes.
Nel Dos Santos
This work is licensed under a Creative Commons Attribution 4.0 International License.
