El congresu, cientráu nel país dende estremaes perspeutives, tendrá llugar pente’l cuatro ya’l siete de febreru y les inscripciones ya tan abiertes

Cuntando cola collaboración de la Universidá d’Uviéu y del Gobiernu del Principáu d’Asturies, l’Academia de la Llingua Asturiana llanza’l Congresu Mundial de Cultura Asturiana (CMCA25). Un alcuentru concebíu de forma interdisciplinar y amplia: dende l’antropoloxía a les demás ciencies y estudios sociales, d’Asturies a cualquiera de los sos marcos de referencia.

Poro, nel CMCA25 podríen trabayase cuestiones tan estremaes como’l mundu rural, la familia y el parentescu, los procesos d’identidá, el patrimoniu, el paisax,la tradición oral, la ciudá, la cultura espresiva, la pertenencia al Arcu Atlánticu, la educación o’l xéneru.

Un foru au converxer dende les metodoloxíes, visiones y problemátiques más actuales: alredor de la minorización cultural y llingüística; de les periferies del primer mundu nel contestu global; del desaniciu y la resistencia cultural.

Un comité científicu entamáu  por 24 espertos de 23 instituciones de más d’una docena de países collaboren col comité organizador compuestu por diez asturianos d’estremáu perfil con Roberto González Quevedo a la tiesta.

Seique’l programa ye por agora provisional, ya se van conociendo los nomes de dalgunos de los ponentes que participarán nesti congresu, comu Paz Moreno Feliu, de la Universidá d’Educación a Distancia, Susana Markendorf, Martha Judith Sánchez, de la Universidá de Buenos Airesde la Universidá Autónoma de México, Gwyneira Isaac, de la Smithsonian Institution, o Laurent Fournier, de la Université Cote d’Azur.

Susana Sela