Bonos díes, bona xente.
“Tiempu seliquino hasta’l sábadu”
Alborecemos con intervalos de nubes medies y altes ya con unes temperatures que tan alrodiu de los 11ºC, rexistrándose nel puirtu Payares 5,9ºC.
Güei vamos tener el cielu empuercáu de nubes medies y altes con unes temperatures másimes en nidiu ascensu ya col aire que sedrá sele ya variable pero arreciando a vientu gallegu pela nueche en puntos del llitoral y zones altes.
Mañana vienres sedrá el meyor día de la selmana con escasa nubosidá y temperatures suaves nes hores centrales del día, sicasí l’aire pue baxar dalgo la sensación térmica pela costa.
Na alborada del sábadu la llegada d’un frente fríu pol norte va dexanos precipitaciones moderaes y un descensu de les temperatures que fadrá que surda la nieve perriba de los 1300m, una vegada que pase van abrise dellos claros o abancios, más menos al mediudía, y al atapecer los xarabatos post frontales fadrán actu de presencia. A destacar tamién el fuerte vientu de componente noroeste que pue dexar raches fuertes en puntos del llitoral y zones de montaña, onde los xarabatos puen ser llocalmente persistentes.
Domingu día ivernal con xarabatos frecuentes ya intensos, sobre too en zones de montaña, onde puen ser persistentes y en forma de nieve perriba de los 1000m con desplomes por mor de la persistencia ya intesidá de les precipitaciones. Les temperatures en bultable descensu y l’aire de componente norte con raches fuertes en zones de alta montaña ya en puntos del llitoral.
El llunes seguiremos con xarabatos llocalmente fuertes y persistentes, amás les nevaes van ser mui copioses na cordelera, sobre too na fastera oriental con un nuevu descensu de les temperatures que fadrá que surda la nieve perriba de los 700-800m. L’aire seguirá soplando con fuercia nes zones altes y llitoral, baxando entovía más la sensación térmica.
El martes los xarabatos dirán perdiendo fuercia ya intensidá pa tender a remitir pela tarde, anque les temperatures siguen baxando con una cota de nieve que pue rondar los 600-700m.
A partir del miércoles paez que s’estabiliza dalgo’l tiempu y entamará a xelar, situación perbona pa qu’asiente la nieve y entren a furrular los cañones de nieve nes estaciones d’esquí, pero esto yá lu diremos viendo.
Que paséis un bon xueves collacies ya collacios.
Semeya que mos l’apurre Luis Alfredo de la Braña La Corra con Pena Prieta al fondu.
This work is licensed under a Creative Commons Attribution 4.0 International License.
