Iniciativa pol Asturianu reclama al Consorciu de Tresportes d’Asturies l’usu de la llingua na so web, cartelería y comunicaciones

L’asturianu sigui siendo una asignatura pendiente pal Consorciu de Tresportes d’Asturies (CTA). L’organismu dependiente del Gobiernu del Principáu punxo en marcha en marzu del añu pasáu la plataforma CTA Conecta pa simplificar l’usu de la rede de tresporte públicu autonómicu. Con ella, entró tamién en serviciu la web nueva de la entidá. Sicasí, casi dos años depués y magar los pidimientos d’Iniciativa pol Asturianu n’aquel momentu, les llingües propies d’Asturies siguen ensin presencia dala. Por esti motivu, Iniciativa pol Asturianu reclama al recién escoyíu director xeneral del CTA, Gonzalo Canga, que cumpla cola llegalidá y respete como mínimu la toponimia oficial nel ámbitu del tresporte públicu n’Asturies, tantu na so web comu na cartelería de les diferentes llinies de tresporte que dependen del Consorciu. La Llei d’Usu y Promoción del Asturianu ye clara nesti sentíu y recueye que: “Los topónimos de la Comunidá Autónoma del Principáu d’Asturies han tener el nome oficial na so forma tradicional”.

Pa l’asociación una entidá con naturaleza d’ente públicu como ye’l casu del CTA tien que xugar un papel importante na normalización social del idioma asina como na so visibilidá. D’igual manera, el colectivu recuerda la esistencia d’un Manual de llinguaxe alministrativu en llingua asturiana que’l Conseyu de Gobiernu del Principáu d’Asturies publicó esti añu 2024 pa fomentar l’usu del idioma n’Alministración Pública.

La entidá afala tamién al consorciu a faer usu de los idiomes propios nes diferentes campañes pal usu del tresporte públicu, implicando tamién a les entidaes llocales asociaes, pa llograr un usu normal de la llingua nes comunicaciones, anuncios o cartelería, implicando nesta xera a la Dirección Xeneral d’Acción Cultural y Normalización Llingüística. “Ye importante qu’una sociedá pública como ye’l casu del Consorciu de Tresportes d’Asturies caltenga un claru compromisu cola normalización y col cumplimientu de la Llei d’Usu y Promoción del Asturianu, acordies cola llínia marcada pol gobiernu autonómicu” declaren.

Susana Sela

This work is licensed under a Creative Commons Attribution 4.0 International License.