El Grupu Sofitu a los 2 Güelguistes d’Alsa realizó el día de Nuechibona un nuevu actu d’apoyu a estos dos trabayadores, que tienen peticiones de 3 años de prisión caún tres la so participación na güelga que tuvo llugar nel Grupu d’Empreses ALSA n’ochobre de 2020.
Nesti actu de la campaña divulgativa, el coleutivu repartió fueyes informatives na estación d’ALSA d’Uviéu y distribuyó pegatines ente los viaxeros y viaxeres.
El 5 d’ochobre de 2020 los y les trabayadores del Grupu d’Empreses ALSA entamaben una güelga col oxetivu de recuperar al 100% les llinies y frecuencies d’autobuses y el serviciu de taquilles, poner frenu a los despidos y facer cumplir les condiciones llaborales establecíes nel conveniu coleutivu.
La güelga tuviere un siguimientu total de la plantiya, y les asociaciones vecinales y coleutivos sociales convocaren importantes manifestaciones de sofitu a la güelga y a les reivindicaciones de los y les trabayadores.
Pa llimpiar esta pésima imaxe de la empresa y desviar l’atención hacia los y les güelguistes, ALSA denunció desperfeutos nos sos autobuses, acusando d’ello a les y los trabayadores, dalgunos de los cualos enfréntense agora a peticiones de 3 años de cárcel pa caún.
En xineru de 2025 va tener llugar un xuiciu escontra estos dos trabayadores acusaos pola empresa ALSA, por defender la salú de la población y los derechos de los y les trabayadores mentantu que, comu denuncien dende’l Grupu Sofitu, les illegalidaes y el atropellu que la empresa multinacional taba cometiendo n’Asturies, nunca merecieron nin una sola investigación.
Nel Dos Santos
This work is licensed under a Creative Commons Attribution 4.0 International License.
