Bonos díes, bona xente.
” Sigue la nublina na metá norte d’Asturies, mentantu nel restu esfruten del sol “
Alborecemos ente’l borrín y la nublina na fastera central asturiana y llitoral centru-oriental, tando escampláu nel restu con unes temperatures que tan alrodiu de los 7ºC, rexistrándose nel puirtu Payares 5,4ºC.
Güei una vegada más les nublines ya borrinos del alborecer van ser persistentes en munches zones de la metá norte d’Asturies, sicasí nes hores centrales del día puen abrise dellos claros o abancios, tando escampláu nel restu con unes temperatures condicionaes per esti fenómenu, ellí onde nun se dixebre tendremos unes másimes baxes que nun algamarán los 10ºC. L’aire seguirá siendo sele ya variable.
Mañana sábadu vamos tener un día mui asemeyá con Asturies dixebrada pol borrín y la nublina que volverá a ser persistente en munches zones de la metá norte, tando escampláu na sur y cordelera onde volverán a esfrutar d’un día soleyeru y perguapu con unes temperatures que van camudar poco ya col aire que seguirá siendo sele ya variable.
El domingu paez que veremos dalgo más el sol y tantu’l llunes como’l martes por mor del cielu poco nuboso les xelas tenderán a xeneralizase pa dexanos una nueche vieya fría, onde’l xelu dirá ganando terrén.
Pal primer día del añu entovía esfrutaremos del sol, polo menos de mañana y paez que’l día 2 tendremos una ivernada fugaz que pue dexanos precipitaciones abondoses, descensu bultable de les temperatures y nevaes perriba de los 600-700m pero esto yá lu diremos viendo.
Que paséis un bon vienres collacies ya collacios.
Semeya que mos l’apurre’l nuesu collaciu Xuan Nel Gonzali. “El picu La Llinar dende La Peral (Conceyu d’Illas)
This work is licensed under a Creative Commons Attribution 4.0 International License.
