Paez que nun avances no llingüístico, pero ca añu Iniciativa pol Asturianu esfuérzase por topar una riestra de noticies optimistes nel ámbetu llingüísticu, d’ente les que cola collaboración de los ciudadanos escueyen “la meyor”. Los participantes disponen de diez díes pa votar ente una ventena de noticies positives pal asturianu dende estremaos ámbetos

Iniciativa pol Asturianu anició esti martes la votación pa escoyer la Meyor Noticia pal Asturianu del añu 2024. La llista coles diferentes noticies candidatables ta disponible na páxina web de la organización, dende onde se da accesu a la votación. Na escoyeta inclúinse anuncies de diferentes puntos del dominiu llingüísticu como Miranda y Llión. Los usuarios disponen d’un total de diez díes pa escoyer ente la meyor noticia del añu qu’acaba de terminar. Cada participante puede votar un total de diez noticies.

Esta iniciativa, ñacía nel añu 2013, cumple agora doce años recoyendo una bayura de bones noticies pal asturianu. Amás de faer repás a la escoyeta de noticies favorables pa les nueses llingües, ye una manera de dar ánimu y fuercies pa entamar esti añu 2025 y pa valorar el trabayu, ilusión y esfuerciu que llevamos poniendo nel nuesu trabayu pol asturianu. Tamién val pa revisar tol llabor d’Iniciativa pol Asturianu y pa comprobar cómo añu a añu la llingua asturiana tien una repercusión positiva nos medios de comunicación.

La votación, que ta abierta a tola ciudadanía que quiera participar, tará disponible hasta’l vienres 10 de xineru a les doce de la mañana. Ente tolos participantes va sortiase un llote de llibros n’asturianu.

Formulariu de votación coles noticies