El prósimu llunes venti de xineru una concentración acompangará delantre los Xulgaos de Xixón a los dos güelguistes acusaos por defender los sos drechos llaborales
Nel 2020 los trabayadores d’Alsa convocaben una fuelga na que demandaben la recuperación del 100% de les llinies y frecuencies asina comu la recuperación de les taquilles, poner frenu a los despidos y facer cumplir el conveniu coleutivu.
Los retayos foren implementaos cola esculpia de la pandemia, imponiendo unes condiciones abusives al tiempu que cobraben sovenciones miyonaries; pero como en tantos otros casos, el fin de la emerxencia sanitaria nun traxo consigo la recuperanza de drechos nin de servicios, lo que desencadenó la fuelga, sofitada non solo pola plantiya al completu sinón poles asociaciones vecinales y coleutivos sociales.
Cola intención de desprestixar esta llexítima defensa, la empresa denunció desperfechos nos autobuses, acusando d’ellos a los trabayadores y denunciándolos.
La “xusticia” ignoró ensin investigación dala les illegalidaes cometies anantes y demientres la fuelga: los servicios mínimos abusivos, la sustitución de trabayadores en fuelga, l’incumplimientu del conveniu coleutivu, supresión de llinies y servicios, incumplimientu de midies anti covid o la concesión dudosamente xustificada de sovenciones, pero almitió la denuncia contra los trabayadores y esti llunes 20 de xineru entama’l so xuiciu.
La sociedá asturiana ta llamada a acompangalos delantre los Xulgaos a les nueve la mañana, pa brinda-yos el másimu sofitu y denunciar el sistema de castigu sistemáticu a la llucha sindical que ta xeneralizándose como midía pa frenar l’autodefensa de les y los trabayadores.
Llucía F. Marqués
This work is licensed under a Creative Commons Attribution 4.0 International License.
