Bonos díes, bona xente.
” Torna la lluvia xeneralizada esta tarde “
Alborecemos col cielu mui nuboso y precipitaciones al sur de la cordelera, nel restu nun s’esperen hasta esta tarde con unes temperatures que tan alrodiu de los 11ºC, rexistrándose nel puirtu Payares 4,5ºC onde ta lloviendo.
Güei vamos tener el cielu mui nuboso cola posibilidá de dalguna gotera a primeres hores pero nun sedrá hasta la tardiquina cuando les precipitaciones van xeneralizase en toa Asturies con el role del vientu a componente norte, mentantu les precipitaciones van quedar llocalizaes na fastera surocidenta y cordelera pela mañana con unes temperatures que van camudar poco con tendencia a baxar al finar el día. La cota de nieve anicialmente va tar perriba de los 2000m pero dirá baxando hasta situase sobre los 1600-1700m.
Mañana xueves alboreceremos ente’l borrín y la nublina que dirán dixebrándose a lu llargu la mañana pa dexanos el cielu con nubes ya claros durante’l día y una tarde mui soleyera pero con unes temperatures en descensu que mos dexará un ambiente más bien fríu.
A partir del vienres por mor d’una circulación zonal baxa mui marcada van lleganos una sucesión de borrasques que mos empobinarán vientos mui fuertes, mui mala mar y el paso de dellos frentes atlánticos que barrerán Asturies d’oeste a este. De momentu’l vienres dirá coyendo puxu l’aire ábrigu apurriéndonos nubosidá, subida de les temperatures pero sin precipitaciones, nun sedrá hasta’l riscar del sábadu cuando entama a llover col pasu del primer frente, pel día quedarán intervalos nubosos con dalgún xarabatu intermitente con unes temperatures en descensu ya cola cota de nieve baxando de los 2000m hasta los 1200m.
El domingu les raches de vientu gallegu dirán n’aumentu amás un nuevu frente mos barrerá dexándonos precipitaciones a partir del mediudía con una cota de nieve que rondará los 1400m. con unes temperatures que van camudar poco.
Muncho precuru’l llunes porque paez que tendremos un temporal importante de vientu y mui mala mar con raches que puen algamar los 150km/h nes zones más favoretibles, amás seguirán sucediéndose los frentes atlánticos con precipitaciones al soo pasu.
El restu la selmana viniente va ser inestable y ventosa, amás les temperatures baxarán ya tendremos dalguna nevada perdebaxo de los 1000m. pero esto yá lu diremos viendo.
Que paséis un bon miércoles collacies ya collacios.
Semeya que mos l’apurre’l nuesu collaciu Luis Alfrendo Hernández Fernández
This work is licensed under a Creative Commons Attribution 4.0 International License.
