La Fundación Asturies XXI entama esti sábadu una espicha n’honor al illustre asturianu recientemente fináu “ye lo qu’elli querría”
El sópitu fallecimientu el pasáu mes d’avientu, a la temprana edá de 67 años, del economista, escritor, políticu y espertu n’hestoria d’Asturies y cultura sidrera, David M. Rivas Infante, ximielgó la sociedá asturiana, qu’echa en falta’l conocimientu, la claridá mental y la gracia d’esti intelectual xixonés.
El curriculum de Rivas ye ablucante: miembru de l’Academia de la Llingua Asturiana, fundador de l’asociación cultural L’Arribada, del Conceyu Asturianu de Madrid y de Conceyu Bable, llicenciáu en Ciencies Económiques pola Universidá Complutense de Madrid y doctor n’Economía pola Universidá Autónoma de la mesma ciudá, onde foi profesor de Estructura Económica; miembru del esclusivu Club de Roma, foi tamién militante activu de Conceyu Nacionalista Astur, de la Unidá Nacionalista Asturiana (UNA) y depués d’Andecha Astur, por quien foi candidatu en dos ocasiones. Foi amás secretariu del Atenéu de Madrid, miembru del Conseyu Asesor de Mediu Ambiente d’España, de la Comisión de Parques Nacionales de la Xunión Internacional pa la Conservación de la Naturaleza (Organización de les Naciones Xuníes) y de los comités de desendolcu caltenible y desendolcu rural de la Comisión Europea. Participó na creación de la Fundación Universidad Libre y fue Presidente d’Amigos de la Tierra y miembru del Observatoriu Llatinoamericanu d’Ordenación Territorial y Caltenibilidá y del Institutu Interuniversitariu d’Economía Espacial Caltenible, Repunante d’Honor y masón reconocíu…
Pero perriba de tou, David Rivas foi un namoráu de la cultura y la identidá asturiana. No que cinca a sidre, foi un de los primeros n’entamar a utilizar el conceutu de “Cultura Asturiana de la Sidre”, siendo collaborador avezáu de la revista LA SIDRA y autor del llibru ‘La sidra asturiana: bebida, ritual y símbolo’,un de los trabayos más completos sobre’l mundu de la sidre.
La Fundación Asturies XXI honra la so memoria con una espicha que va cellebrase’l sábadu ún de febreru a les 20 hores nel Llagar de Piñera, en Xixón, considerando qu’un llagar ye’l llugar onde David querría ser remembráu. Entá pueden reservase entraes.
Pa participar hai que facer l’ingresu de 30 € a la Fundación Asturies XXI
ES86 3007 0100 1320 8860 3820
Indicando’ESPICHA’ y nome del asistente.
Llucía F. Marqués
This work is licensed under a Creative Commons Attribution 4.0 International License.
