Cuando pudieron algamar la oficialidá nun quisieron llevar l’alderique hasta’l final, agora que saben que nun pueden conseguir los votos, quieren vender como un “fechu hestóricu” llevar la votación a la Xunta Xeneral
Depués de marafundiar la que foi la meyor oportunidá pa la oficialidá del asturianu de la hestoria l’anterior llexisllatura, cuando si podíen cuntar colos votos necesarios p’algamala, tres de ñegase a negociar y a buscar soluciones cuando les había, agora que saben que nun ye posible que salga alantre, PSOE ya IU col gabitu de la exdiputada de Podemos, Covadonga Tomé, lleven a la Xunta Xeneral la proposición de llei pa reformar l’Estatutu ya incluyir la oficialidá.
Nun ye que lo faigan nun intentu real de conseguir daqué. Pa que la reforma fore aprebada requierse una mayoría parllamentaria reforciao de 27 diputaos, que nun se conseguiríen ensin dalgún votu a favor del PP o VOX. Dicen, ensin asomu de vergoña, que saben que nun va a dengún llau y pretenden vendemos como un ésitu el “fechu hestóricu” de que se lleve la oficialidá a un alderique na Xunta Xeneral, pa sometese a un asonsañu de votación que saben perdía.
Dexando a un llau la llexitimidá -meyor dicho, la falta d’ella- de someter un drechu a votación, en llugar de reconocelu como tal, ¿por qué agora si y va un par d’años non? la rempuesta ta nidia: porque no fondo, nun quieren; porque dende los sos partios en Madrí diéron-yos el toque en so momentu pa que nun tiraren p’alantre; porque agora tienen la posibilidá de quedar bien y asonsañar que faen casu a la demanda de los asturianos, pero ensin arriesgase a conseguilo.
Llucía F. Marqués
This work is licensed under a Creative Commons Attribution 4.0 International License.
