Nesta edición preséntense d’una parte los poemes propios del Padre Galo d’inspiración xaponesa (15 en total) y les tornes del xaponés al asturianu que Fernán-Coronas foi faciendo a lo llargo la so vida lliteraria
El prósimu miércoles 19 de febreru a les 19:00 hores el Salón d’Actos del Muséu Arqueolóxicu d’Asturies va acoyer la presentación del llibru ‘Poemes y traducciones xaponeses n’asturianu’ de Fernán Coronas. L’actu va cuntar cola presencia del editor del llibru, Adrián Martínez Expósito, ya l’escritor Xuan Bello.
Un total de 34 traduciones, de les que 19 son inédites, afayaes ente los 3.300 documentos que remanen los que trabayen nel Proyectu Fernán Coronas de la Universidá d’Uviéu, más quince poemes, de los que cinco yá apaecieren en ‘Poesía asturiana y traducciones’ (1993), componen esta obra, que quier ser el primer llibru de la Biblioteca Fernán-Coronas, colección que tenta de dar a conocer al públicu xeneral la obra d’un autor fundamental de la lliteratura n’asturianu, Galo Antonio Fernández y Fernández-Cantera, más conocíu como Padre Galo o Fernán-Coronas.
Esti llibru ye ún de los primeros resultaos del Proyectu Fernán-Coronas, una iniciativa de la Fundación Valdés-Salas en collaboración cola Universidá d’Uviéu, financiada pola Conseyería de Cultura, Política Llingüística y Turismu del Principáu d’Asturies y dirixida pol Profesor Xulio Viejo Fernández. Nesti proyectu la Fundación Valdés-Salas cuenta tamién col sofitu económicu de la empresa Cartonaxes Vir y con un conveniu de collaboración col Real Instituto de Estudios Asturianos (RIDEA), que facilitó l’accesu y tratamientu de los fondos documentales del Padre Galo depositaos nesa institución.
Al actu acudirán Adrián Martínez Expósito, graduáu n’Estudios Clásicos y Románicos y minor n’Asturianu pola Universidá d’Uviéu, miembru del grupu d’especialistes llingüísticos que formen parte del Proyectu Fernán-Coronas y que ye l’editor d’esta obra, asina comu l’escritor Xuan Bello.
Susana Sela 
This work is licensed under a Creative Commons Attribution 4.0 International License.
