Asturies va a menos y nun ye una forma de falar: la cabera sentencia de l’Audiencia Nacional española quita cerca de 700 hectarees al territoriu asturianu, forciando a camudar les llendes y retayar -más entá- el país, ensin qu’ello xenere dala rempuesta por parte de la presidencia d’Asturies

El progresivu retayu d’Asturies paez nun tener fin y tien un capítulu más na reciente decisión de l’Audiencia Nacional Española d’arrampluñar al conceyu Somiéu parte’l so territoriu pa cedelu al concellu de Cabrillanes, en Llión. Ello traten de xustificalo en virtú d’un alcuerdu del sieglu XVIII, ya entós illegal por faltar l’aceutación del representante somedanu de la dómina, y que foi rebasáu polos alcuerdos roblaos nos sieglos XIX y XX nos que s’alcordaron les llendes ente Villablino, Cabrillanes y Somiéu.

Dexando a un llau la nidia inesautitú hestórica de la reclamación por parte de los llioneses, cualisquier alteración de les llendes de les nomaes “comunidaes autónomes” tien de ser aprebada, acordies l’artículu 141.1 de la Costitución española, nes cortes xenerales y a traviés de llei orgánica, polo que camudar el mapa d’Asturies, retayando un cachu más y dando-ylu a Llión por sentencia xudicial tendría de tar fuera de toa posibilidá.

Sicasí, ello ye lo que vien de pasar, los vecinos de Somiéu acaben de ver como l’Audiencia Nacional yos arrampluña cuasi 700 hectarees de montes vecinales en mancomún, utilizaos pa llevar a pacer el ganao y propiedá de los somedanos dende hai sieglos, cola consecuente repercusión económica, una bones la so perda implica tamién la desapaición de les aides de la PAC asociaes.

Seique l’alcalde de Somiéu ya anunciare que dende’l conceyu van tomase midies al respeutu, abluca la falta de reacción por parte del presidente d’Asturies, que fasta’l momentu nun dio rempuesta a lo que ye a cencielles un inadmisible bocáu al territoriu asturianu; una pasividá asemeyada a la amosada ante los amenorgamientos de drechos, de financiación o de población que van faciendo d’Asturies l’increyible país menguante.