El comité d’empresa de la Conseyería de Drechos Sociales y Bientar denuncia la falta de comida y productos hixénicos n’escueles infantiles, centros pa persones con discapacidá y centros de menores. Los soministros a los dispositivos asistenciales nun aporten, faenlo sero o son escasos
Tres de les primeres presiones per parte del comité esta selmana entamaron a aportar a los centros de menores dalgunos alimentos básicos, como pan, aceite, llechi o llegumes, a toes lluces insuficientes pa dar a los sos residentes l’alimentación que precisen. Falten tamién productos pa la hixene básica, non solo nesos cientros sinón en centros pa persones con discapacidá y escueles infantiles, onde los profesores suplen en munchos casos la falta de toballines húmides pa llimpiar a los más piqueños. Nunos fala llexía, n’otros incluso papel del bater o pasta de dientes. La dificultá pa la hixene ya tien consecuencies: brotes de sarna en tres centros de menores, andanciu difícil d’atayar si nun ye con una llimpieza estrema y continua.
L’orixen d’esta falta d’abastecimientu ta nel impagu de más de 90.000 euros a los proveedores, que denuncien impagos de factures pendientes dende l’añu 2023 y menacien con suspender dafechu la entrega de materiales. Dende la Conseyería almiten la delda y prometen pagar “una parte” d’ella pa que continúen col repartu.
Los soministros pa estos centros tan recoyíos nos presupuestos de los años anteriores, colo que cabe entrugase aú foron a parar los fondos destinaos al pagu d’eses factures pendientes.
Nel Dos Santos
This work is licensed under a Creative Commons Attribution 4.0 International License.
