Llaboral Ciudá de la Cultura de Xixón va acoyer del 8 al 10 d’abril esti eventu pal que yá hai un primer avance de la programación: doce showcases diez charres y talleres; amás de los alcuentros comerciales, presentación de proyectos y los ‘almuerzos y espicha en rede’. 

En poco más d’un mes arranca la segunda edición de Música en Rede. Alcuentru profesional, les xornaes dedicaes a la industria musical qu’entama la Conseyería de Cultura, Política Llingüística y Esporte a traviés de Cultura en Rede. 

Música en Rede ye una amuesa sectorial dedicada a la música nel marcu del proyectu Asturies, Cultura en Rede que pretende contribuyir a la profesionalización, capacitación y dinamización del texíu asociativu y empresarial de la industria musical asturiana, xenerando espacios pa l’aprendizaxe, la interacción, l’alderique y la reflexón, ente los distintos axentes arreyaos nel ecosistema musical, llevando a cabu una acción de mediación cultural ente artistes, promotores asturianos y programadores de cara a la escoyeta d’espectáculos pa la so programación. Amás, trata de promover y potenciar la visibilidá de nuevos estilos de creación, nuevos llinguaxes artísticos y musicales y, sobremanera, proyectos novedosos qu’arriquezan el panorama musical. Tamién pretende fomentar el desenvolvimientu de la marca Asturies, Cultura en Rede.

Al traviés d’el Alcuentru profesional, Música en Rede, pretende establecese un puntu d’alcuentru profesional y comercial nel que los axentes implicaos na industria musical d’Asturies tengan la oportunidá d’amosar el talentu de los artistes asturianos, creándose sinerxes ente profesionales del sector, xenérense espacios d’alderique y plantegándose nueves dinámiques nel ecosistema musical que redunden na profesionalización.

L’alcuentru va tener llugar en Llaboral Ciudá de la Cultura en Xixónente’l 8 y el 10 d’abril de 2025 y va cuntar con un programa d’actividaes como XUNTES (alcuentros comerciales), CONXUSTES (meses reondes), ROLDA (presentación de proyectos), ERBÍES (talleres técnicos) y LLABOR (showcases), pa qu’artistes, profesionales y públicu tengan oportunidá d’interactuar y texer redes, amás de ser un escaparate pa visibilizar, dinamizar y profesionalizar la música emerxente fecha n’Asturies.

Ente los showcases tán confirmaes les siguientes propuestes artístiques venceyaes a la música n’asturianu: Llevólu’l Sumiciu, Cerezal, Vero Rubio, Alienda y Herbamora -tamién toquen otros proyectos que nun canten na llingua autóctona: De Fem, María Diaz, The Soulers, Blues&Decker, Marco Martínez Trío, Akin&The Afrobeat Brothers y Maimuny-. Toles actuaciones van ser de baldre y van facese de martes a xueves, ente les 18.30h y les 21.30h nel Paraninfu y nel Teatru de La Llaboral.

D’otra banda, tamién s’anunciaron los nomes de les charres que va haber dientro d’ERBÍES, y COXUSTES. Va haber tres sesiones formatives: Celtic Connections & Festival Interceltique de Lorient: dos modelos d’éxitu; Financiamientu autonómicu pa la música n’Asturies; y DIY 101: Claves pa empezar cola autoxestión musical. Los coloquios van ser siete: Ciudaes musicales y turismo musical: un futuru sostenible p’Asturies; Entornos dixitales y música: fórmules de comunicación nueves; Una asociación nueva de mánagers musicales pa España; Dende Asturies al mundu: 3 exemplos dende lo local; Propuestes metodolóxiques nueves pa la enseñanza musical; Música y autoxestión dende les periferies: failo tu mesmu, failo meyor; Sync y Licensing musical: oportunidaes na industria audiovisual.