Mañana nun me feliciteis. El día de la Muyer -lo de Trabayaora munchos quieren dexalo pa práu- ye munches coses, pero non feliz, ya’l d’esti añu esconsoña en mi sentimientos alcontraos, que nun pue torgar la necesidá de salir a desixir los drechos que mos correspuenden
2025, Asturies, cincu denuncies d’ataques sexuales a muyeres por selmana, más de dos al mes namás n’Uviéu. La mayor brecha salarial del Estáu, colos homes ganando una media de 6.600 euros al mes más que les muyeres -datu: una autónoma trabaya de media cuatro hores más al día qu’un home, ensin ser siquiera asina quien a algamar el mesmu salariu de los sos compañeros- . Una muyer tien un 25% menos de posibilidaes d’algamar un créditu empresarial. La probitú ya’l riesgu d’esclusión social algama al 28% de la población femenina, xorreciendo a les astronómiques cifres del 40% en families monomarentales y de cerca’l 70% de les xubilaes y pensionistes.
529.948 muyeres viven güei n’Asturies, cuasique dos de ca tres reconoz qu’esperimentare a lo llargo la so vida dalguna forma de violencia física o sesual. Albídrase que se callen más abusos de los que se cuenten. Agora mesmo tan contabilizaes n’Asturies 1.212 mujeres en contestos de prostitución y d’esplotación sesual.
A nivel mundial, acordies la ONX en toles fasteres del mundiu, ensin esceición, les muyeres cobren menos, siendo ello que la gran mayoría de les muyeres del mundiu nun tienen posibilidá d’aceder siquier a un contratu. Ca diez minutos una muyer o rapacina ye asesinada pola so pareya o familiar, cerca de 90.000 al añu ¿Imaxinaisvos que mataren, pongamos por casu, esa cifra de prietos, de ruanos, de miopes o de cualisquier otru colectivu namás por ñacer con una determinada carauterística?.
Les muyeres somos el 51% de la población, pero siguimos siendo’l 75% de los probes ya’l 83% de les families monoparentales, percibimos l’11% del capital y poseemos l’1% de la tierra.
Énte tou ello, ¿Cómo nun reaccionar? ¿Cómo nun salir a la cai, como nun manifestase?
Sicasí…
Un manifestamientu busca un cambeu, forciar a quien tien el poder a camudar daqué en beneficiu de los manifestantes o d’aquellos a los que los manifestantes defenden. Otra cosa, pasiase con banderes vociando deseyos al debalu ensin destinatariu concretu, llámase procesión o desfile, y ta fecho pa ser visto y presumio, ensin mayor enfotu.
Concretamente, el de mañana tendría de ser un manifestamientu a favor de la muyer trabayaora, por muncho que nos caberos tiempos se intente robar a la clas obrera esti díi diluyéndolu nun muncho más xenéricu “Díi de la muyer”. En favor de quier dicir, pa conseguir meyores pa elles; meyores que tienen de venir dende les alministraciones públiques que les gobiernen y de les que dependen cuestiones comu les sos condiciones llaborales, la puesta en marcha de midies de creación d’emplegu, la facilitación de la conciliación familiar y la organización d’un sistema de curiaos eficiente que llibere a quienes de fechu se faen mayoritariamente cargu d’atender a dependientes, la seguridá nes cais y munches otres cuestiones.
Por si nun se m’entiende, resumo; mañana ye un díi pa pedir a los poderes públicos una implicación real que fine cola discriminación de la muyer, potenciada dende’l mesmu sistema patriarcal que representen.
Pero los convocantes del manifestamientu son, precisamente, l’executivu d’Asturies y los principales partios nel poder, responsables por aición u omisión de la situación de les muyeres n’Asturies. Ello ye, que convoquen un manifestamientu pa reclamar unes soluciones que namás ellos pueden poner en práutica.
Por eso digo que teo sentimientos alcontraos. ¿Quedar en casa y nun visibilizar la rabia? ¿Manifestase y facer xuegu, mientres siento que se rien de min? Albidro que saldré, que diré a la mani, asturina en man, a reclamar los mios drechos, los de la mio fia, los de toles muyeres. Nun hai otra, la necesidá de lluchar siempres gana.
Llucía F. Marqués
This work is licensed under a Creative Commons Attribution 4.0 International License.
