Nes sos caberes declaraciones, el presidene apostó por “tomase en serio la importancia de la inversión en defensa”, desoyendo la voz del pueblu asturianu, de los primeros en posicionase contra’l rearme y les guerres
Cuando los tambores de guerra entamaron a sentise per Europa, ñació n’Asturies la plataforma “Asturies contra les guerres”, qu’a lo llargo del 2024 desendolcó una bona riestra d’actividaes denunciando la deriva militarista con un duple enfoque, el pacíficu y l’obreru “nun queremos gastar n’armes lo que necesitamos pa vivir“, declaraben, con clarividencia, viendo venir comu diben querer gastar les perres del pueblu n’armamentu col que atacar otros pueblos.
Mui a la contra d’esti puntu de vista, Adrián Barbón, bon amigu de grandilocuencies y pallabres vanes, vien de declarase percontentu del gastu militar, faciendo declaraciones de tonu belixerante y si se me permite, llixeramente ridículu “Acabóse’l tiempu de qu’otros nos protexíen” declaró. ¿Qué otros? ¿De quién nos protexeron? ¿Refierse a comu nos protexó l’exércitu español y l’alemán bombardeando Asturies?. “Si queremos defender el nuesu mou de vida y vivir en paz” insiste, echando man d’ún de los oximorones más trillaos “Europa tien que tomarse en serio la importancia de la inversión en defensa”.
A la fin, por muncho qu’a los asturianos ofiendan -o non- les pallabres d’Adrián, el fechu ye qu’elli tien pocu que dicir nel tema: el gastu militar va venir impuestu dende Madrid, dende Europa y si m’apures dende EEXX. Asturies, y per ende’l so presidente, nun tien capacidá de decisión dala; pero bono, elli saca la semeya, saca pechu y fae declaraciones… Barbón ye asina .
Llucía F. Marqués
This work is licensed under a Creative Commons Attribution 4.0 International License.
