Facémonos ecu del Manifiestu de la Plataforma Asturiana pola Universidá Pública y convidamos a los nuesos llectores a roblar la correspondiente pidición
Nos últimos meses, la prensa vien informando del desembarcu de les universidaes privaes n’Asturies, con dosis altes de trunfalismu y poniendo en dulda la calidá académica de la Universidá d’Uviéu. Acordies coles noticies, la Universidad Europea va abrir un campus na redolada de Cabueñes ufriendo dellos graos, ente los que s’atopen el de melecina o drechu pa, según dicen, cubrir la demanda d’estes titulaciones. Entemedies d’ello, la Universidad Nebrija planea abrir un centru adscritu n’Avilés, ufriendo estudios d’español pa estranxeros y un grau d’enfermería que s’enseñaría nel Palaciu de Camposagrado, moviendo la Escuela Superior d’Arte del Principáu d’Asturies (ESAPA) d’ellí. Estos planes faen la promesa d’afondar na asina llamada “collaboración público-privada”, un términu paragües baxo’l que s’escuende l’abandonu pasu ente pasu de los servicios públicos y lléndase’l llabor universitariu a intereses privaos.
Si echamos una güeyada pa otres Comunidaes Autónomes, presuntamente “más modernes y competitives”, la Universidad Europea va suponer pal alumnáu de delles titulaciones costes de matricula de más de 20.000€ añales, torgando dafechu la igualdá d’oportunidaes qu’ha caracterizar cualesquier institución educativa. Énte l’altu nivel formativu que se precisa pal accesu al grau de melicina, permitiráse qu’una minoría pueda reblagar les hores d’estudiu y acceder a una titulación homologada a golpe de talonariu. Per otru llau, hai que señalar que los estudios que pretenden ufrir estes instituciones privaes yá esisten anguaño na Universidá d’Uviéu, de manera que, si lo qu’esmolez al gobiernu del Principáu ye cubrir la so demanda, la igua ha pasar pol refuerzu presupuestariu pa cola universidá pública, non por dar tira a axentes esternos que tienen como fin l’arriquecimientu a costa del estudiantáu, poniendo en xuegu bienes tan importantes como la educación pública y la igualdá d’oportunidaes. Una montonera d’años vieno usándose l’argumentu de que les titulaciones sanitaries, na Universidá d’Uviéu, nun podíen medrar les sos places por nun tener profesoráu abondo y por nun disponer de sitiu pa facer les práutiques nos hospitals públicos, polo que se nos plantega una dulda: ¿ónde va facer les práutiques l’alumnáu de les universidaes privaes?
Hemos sorrayar qu’estes universidaes privaes ufren, d’anteman, estudios en graos sanitarios (Enfermería y Melecina) conociendo la necesidá de profesionales esistente anguaño, provocada por una mala planificación de los recursos, xunto a la medra de la sanidá privada na nuestra comunidá cola apaición d’hospitales privaos nuevos.
La Universidá d’Uviéu cuenta con requisitos estrictos d’accesu pal so profesoráu, que busquen asegurar los máximos criterios de calidá na docencia ya investigación. Amás, la Universidá d’Uviéu ta comprometida cola sociedá asturiana al traviés d’una bayura d’investigaciones y proyeutos, qu’influyen positivamente en tola ciudadanía. Les universidaes privaes son empreses que busquen optimizer costes, siendo lo mesmo la calidá como la investigación criterios secundarios. Nelles, les normes d’accesu son más febles y les condiciones llaborales de profesoráu y personal alministrativu y de servicios…peores.
El nuestru gobiernu autonómicu ha facer gala de la esceición que supón Asturies como finxu nel accesu a la educación pública, irguiéndola al grau de virtú y alloñándose de los cantos de serena de la iniciativa privada. Ha valorar la historia y patrimoniu de la nuestra Universidá Pública, que más alló de los beneficios económicos qu’apurre a Asturies, cuenta con enfotu social. Iniciatives como la Estensión Universitaria, PUMUO o’l llabor d’espardimientu del so personal investigador son namás dellos exemplos de la importancia y valor que tien la Universidá d’Uviéu p’Asturies.
L’enseñu priváu, axustáu a criterios de ganancia, namás beneficia a quien pue pagar los costes elevaos de los sos títulos universitarios.
Personal docente, alministrativu, estudiantáu, miembros de la comunidá educativa y ciudadanía hemos acoyer una resolución decidida pol puxu de la nuestra universidá, una universidá de calidá, pública y accessible pa toes y toos.
This work is licensed under a Creative Commons Attribution 4.0 International License.
