Les contines xubíes del preciu la vivienda tán convirtiéndola nun artículo de luxu qu’acaba por llevar a la precariedá y la probitú a munches families, cuyos sueldos nun xuben na mesma proporción y yá nun pueden soportar el gastu en vivienda.
Dellos coleutivos y asociaciones vecinales desplegaron una gran pancarta n’El Solarón de Xixón, denunciando la brutal especulación que ta produciéndose nel seutor de la vivienda.
En términos xenerales, el preciu mediu de la vivienda n’alquiler n’Asturies ye de 9,6 euros el metru cuadráu. Eso representa una xubida del 12,5% nun añu.
D’esta manera, los alquileres medios de vivienda n’Asturies ronden los 700-900 euros mensuales, llevándose una parte los ingresos que munches y munchos trabayadores yá nun pueden afrontar, ya que’l coste l’arriendu supera’l 50% de los ingresos pa munches persones, algamando’l 100% pa otres, depués de la descomanada xubía carecía los caberos años, amparada nel espoxigue turísticu y la llegada de teletrabayadores dende zones más riques, si, pero tamién por mor de la especulación y l’arriquecimientu de fondos utres y rentistes ensin escrúpulos.
Nel 2024 un mínimu de 100.000 cases taben oficialmente en desusu, yá seya por especulación, desdexamientu o llerza a los impagos d’arriendos. A elles hai que sumar otres 28.000 que namás s’utilicen un mes o menos al añu y les 152.000 que s’ocupen bien esporadicamente, ello ye, un total de cuasi 300.000 viviendes que nun s’utilicen como residencia avezada, alredor del 40% de les disponibles en toa Asturies. Miles de persones ensin vivienda y decenes de miles de cases vacíes.
Nel Dos Santos
This work is licensed under a Creative Commons Attribution 4.0 International License.
