La formación, de nivel anicial y que cuntará con un programa de 50 hores que va desendolcase a distancia, va entamar el 28 d’abril pa rematar el 11 de xunetu

Iniciativa pol Asturianu abre’l procesu de matrícula d’una nueva convocatoria de cursos d’asturianu. La formación va desendolcáse a distancia, al traviés d’una plataforma dixital, dende’l 28 d’abril al 11 de xunetu, lo qu’equival a 50 hores llectives. La formación va dividíse del siguiente mou: 25 hores de tutoríes a distancia -de manera obligatoria-, otres 20 de trabayu autónomu y 5 hores complementaries que va proponer el tutor/tutora. Al final de la formación va facese una prueba. La modalidá a distancia favorez la autoorganización del alumnáu y permite-yos dir faciendo les actividaes, de manera más conveniente, amás de posibilitar la participación de persones que viven allonxaes.

Pal desendolcu del cursu van proponese dos grupos. Los martes a les 17:00 hores o los xueves a les 16:30 hores. Nesi sen, hai que recordar que la participación nestes tutoríes telemátiques ye obligatoria.

Esti nivel inicial ta empobináu a persones ensin formación d’asturianu o con nivel baxu de conocencia. Los estudiantes que superen el cursu van algamar una acreitación de l’Academia de la Llingua Asturiana que certifica una formación d’asturianu. El preciu de la matrícula ye de 75 euros. Les persones asociaes a Iniciativa pol Asturianu van beneficiase d’un descuentu del 20%. Toles persones interesaes pueden asociase nel momentu de la matrícula y disfrutar d’esti descuentu. Les inscripciones pal cursu pueden cubrise nun formulariu de matrícula  na propia páxina web d’Iniciativa pol Asturianu, onde tamién s’alcuentren toles condiciones pal mesmu.