Horru on line suma ya 170 denuncies pol desdexamientu d’horros y paneres

24 Abril, 2025

35 casos d’horros y paneres en situación de riesgu foron rexistraos namás no que llevamos nel mes d’abril

Acordies el Gobiernu Asturianu, n’Asturies, anguañu, hai más de 20.000 horros, paneres ya cabazos. A xineru del añu 2025, nun hai dengún declaráu BIC. Naide pon en dubia que los horros y paneres d’Asturies son parte fundamental del nuesu padremuñu; naide cuestiona tampocu que’l padremuñu asturianu tien pa los nuesos gobernantes l’interés xustu de lo que yos paeza profitable pal turismu; los horros, espardios per toa Asturies, d’utilidá mayormente campesina, nun yos paecen turísticamente rentables, asina que lo mesmo yos da que balten o non. Esa desidia vese na ruindá de les sovenciones pa la reparación d’horros, na inesistencia d’un rexistru d’estes edificaciones y na falta d’intervención ante casos de pelligru d’esbarrumbe.

Horru on line, cola llei na man, trata de sosanar esa situación cola collaboración ciudadana, creando un rexistru propiu d’horros y paneres y denunciando ante les autoridaes competentes les situaciones de llaceria nos que s’alcuentren munchos.

Les cifres respiguen: a una selmana d’acabar el mes d’abril, la recién creada asociación que cientra la so actividá en censar horros, paneres y cabazos, denunciando aquellos casos nos que’l so desdexamientu fae temer pola so pervivencia, lleven presentaes un total de 170 denuncies pola situación d’horros y paneres per tola xeografía asturiana, 35 namás no que va d’esti mes.

Nes sos denuncies incluin semeyes de los horros y paneres, con fecha, hora y allugamientu concretu, a poder ser tamién con referencia catastral d’aú tan ya un mapa cola llocalización. Poro, ye perimportante si se quier collaborar unviar les semeyes col allugamientu precisu, meyor si ye con xeollocalización.

Una bones fecha la correspondiente carpeta, en dixital y papel, soliciten cita nun Servidiu d’Atención Ciudadana ya presenten denuncia énte Padremuñu ya l’Ayuntamientu que seya.

Pesi a siguir tol procedimientu llegal al pie de la lletra, siguen esperando a recibir dalguna rempuesta polos sos-munchos- requirimientos.

Llucía F. Marqués