COEMASTUR y la revista LA SIDRA entamen un concursu de diseñu pal conocíu Isidrín, el popular echaor de sidre llétricu.

L’Isidrín ye tou un referente nel mundiu la sidre, discutíu polos puristes del echáu de sidre, pero de reconocíu valir a la hora de llevar la nuesa bébora patrio a sitios onde fasta agora nun yera posible atopala precisamente poles dificultaes que supón l’echar sidre en sigún que ambientes.

Pos bien, esti popular Isidrín aveza amarutase pa la ocasión, cuntando con  versión navidiega, otra de la nuechi d’ánimes, braniegu… y agora, pa esti San Valentin, COEMASTUR, la empresa comercializaora del Isidrín, en collaboración cola revista LA SIDRA vien de convocar un orixinal concursu nel que pa participar nun hai más qu’unviar una semeya d’un Isidrín decoráu por ti, pa entrar nel sortéu d’un esclusivu y perprestosu echaor llétricu valoráu en más de 100 €.

El concursu ta abiertu a toles presones mayores d’edá y podrá participase nel mesmu fasta’l 14 febreru, y el 16 d’esi mesmu mes yá se conocerá’l ganaor, pudiendo ser reclamáu el premiu fasta’l 28 febreru d’esti añu. El nome del ganaor y la semeya daránse a conocer nel númberu del mes de marzu de la revista LA SIDRA, y si vives fuera d’Asturies, nun hai por qué esmolecese, porque unviaráse de baldre a domiciliu.

Pa cualisquier dubia, o consulta, equí tenéis el corréu lletrónicu: coemastur@coemastur.com

This work is licensed under a Creative Commons Attribution 4.0 International License.