La Ordenanza, que llevaba añu y mediu presentada pero ensin avanzar, foi aprebada colos votos a favor de tolos grupos municipales, incluyíu’l Partíu Popular (PP), pero cola ausencia  d’un conceyal d’Izquierda Xunida (IX) , ún del PSOE ya otru  de Foro

El documentu ta pendiente d’espublización nel BOPA, pa la presentación de posibles alegaciones anantes de la so aprobación definitiva na Casa Conceyu y fasta l’intre nun se conocen tolos detalles del mesmu. Lo que si se sabe ye qu’incluyirá una comisión de siguimientu añal que xixile’l so cumplimientu pa evitar que quede en papel moyao, comu pasó cola declaración d’oficialidá nel conceyu.

Puede dicise qu’esta ye una propuesta na que participaron toles estayes: surdió nel entamu del 2.016 de la iniciativa personal del ciudadanu llavianés René Durán, quien presentó la so idega a  Somos Llaviana, dende onde s’espardió a tolos grupos del conceyu, quienes agora l’aprebaron por unanimidá, seique cola significativa ausencia de tres conceyales, el de Foro, un del PSOE y otru d’ IX.

IX presentó delles propuestes pa meyorar el testu, demientres que Foro y PP viéronlu bien ensin facer dalu cambiu. Tres de tratase’l tema nel Plenu de febreru del 2016, l’equipu de gobiernu entamó a trabayar col borrador. Finalmente foi’l PSOE quien, iguando daqué’l documentu anicial, presentó’l testu que vien d’aprobase en Comisión. Nun hai dubia qu’esta ye la xunidá d’aición que los asturianos quixéremos ver p’algamar la oficialidá a nivel nacional.

Llucía F. Marqués

This work is licensed under a Creative Commons Attribution 4.0 International License.