Los resultaos de la encuesta dexen n’evidencia a los detractores del nuesu idioma: la mayoría de los asturianos piden la oficialidá, práuticamente desapaez el conceutu de “falar mal” referíu al asturianu, el 90% de los asturianos considera que tien una bon conocencia del asturianu y el mesmu porcentaxe quier llingua nes escueles

Los primeros resultaos de la encuesta foron adelantaos na Academia de la Llingua Asturiana; tuvo dirixía por Francisco Llera y realizada por Euskobarómetro, nuna amuesa de 600 persones mayores de 16 años escoyíes al azar pente los que moren n’Asturies, polo qu’inclúi tantu a asturianos de ñacencia como a asturianos de residencia.

No que cinca a los vezos llingüísticos y en contra de lo que se mos quier faer camentar, costátase una importante meyora del asturianu como llingua pa la rellación social, siendo importante’l repique na tresmisión llingüística interxeneracional.

Namás el 29 % de los sos habitantes consideren que la llingua d’Asturies seya l’español, entantu que’l 30% opina que ye l’asturianu n’esclusiva y el 36% que lo son dambes.

Conceutos como “falar mal” referío al asturianu tán práuticamente sumíos, atopándose en malpenes un 9% de la población, cuasi’l mesmu porcentaxe que nun quier que s’estudie asturianu (8%). Nesta última cuestión hai un alcuerdu cuasi unánime: el 92% de los asturianos queremos llingua nes escueles, yá seya como optativa, asignatura obligatoria o llingua vehicular.

Pero los datos más llamativos son los referentes a la cosciencia de la población al respeutu de la so conocencia del asturianu, con una sosprendente evolución dende la primer encuesta, fecha nel añu 1991, fasta’l presente. Si na primera atopábemos un 69% de la población con dalgún tipu de conocencia del asturianu, la cifra medra nel 2017 fasta un 90 %, ello ye, la práutica totalidá del país entiende l’asturianu, cifra bien perriba de les que podemos atopar, por casu, nel País Vascu, onde solo’l 42% de la población conoz el so idioma. La escolarización faise notar nes resultancies ya l’alfabetización espárdese, pasándose d’un 15% capaz de lleer y escribir a un 38%.

L’alcuerdu cola oficialidá ye tamién mayoritariu: el 53% de los ciudadanos amuésense total (40%) o parcialmente (13%) acordies con la oficialidá, entantu que solo un 25% ta claramente en contra.

Entá asina, solo un 52% de la población ve vidable la pervivencia del asturianu, a los que se suma un marcáu 18% que resalta un “depende” acusaor: la mayoría de los asturianos (64%) consideren que les instituciones faen pocu o res pa caltener y promover l’asturianu.

Lola Suárez, responsable de Llingua y cultura d’Andecha Ástur, fixo fincapié na responsabilidá de les instituciones na situación de riesgu, pero reconoz que la llectura de los resultaos d’esta encuesta ye alendaora “El gobiernu asturianu nun puede siguir ignorando les demandes de la mayoría de la población asturiana, que dexó bien claro cuál ye’l so allugamientu al respeutu la nuesa llingua. Tán acabándose-y les escuses pa siguir negando la oficialidá.”

Llucía F.  Marqués

This work is licensed under a Creative Commons Attribution 4.0 International License.