El “Principado” reconoz agora la peligrosidá de les emisiones y la necesidá de llendales, tres d’archivar demientres cuatro años les denuncies presentaes pola Coordinadora Ecoloxista d’Asturies
La CEA desixe al “Principado” una investigación de les razones poles que la Direutora de Caltenibilidá y Cambiu Climáticu de la Conseyería d’Infraestructures del Principado entardó cuatro años en reacionar ante la contaminación xenerada pola empresa Galvazinc, asitiada nel Polígonu La Florida nel conceyu de Samartín del Rei Aureliu, pesia les protestes de los vecinos y les prebes presentaes.
Nel 2.013 fueron denunciaes les emisiones, recoyéndose casos asgaya de quemaures ya irritaciones cutánees y documentándose l’apaición de vexetales quemaos pola aición química; pero nun foi fasta agora que decidieron a tomar midíes al respeutu ya’l “Principado” reconoz la necesidá de camudar los sistemes de captación de les cubes de desengrase, decapáu y fluxáu de la llinia de galvanizáu pa que recueyan en dafechu los vapores que se producen durante los estremaos procesos ensin que puedan ser espulsaos al esterior de la nave en forma d’emisiones difuses,
La empresa tien autorización ambiental pa emitir una riestra de sostancies peligroses pa la salú, polo que’l control de les emisiones tien de ser esaustivu. Sicasí, dende qu’esta planta entró en furrulamientu, tuvo produciendo importantes emisiones denunciaes por vecinos y collendantes, apreciándose una bultable y continua emisión de gases dende les sos chimenees.
Les sostancies emitíes pola empresa son:
Ósidu nitrosu, NOx, corrosivu pa la piel ya’l tractu respiratoriu, prevocando enroxecimientu y quemaures cutánees, qu’al alendase puede entamar un edema polmonar. Una esposición llarga pue afeutar al sistema inmune ya’l polmón, dando llugar a una menor resistencia frente a infeiciones y causar cambios irreversibles nel texíu polmonar.
Partícules, pueden entrar nel sistema respiratoriu, aportando a los alveolos, torgando l’intercambiu afayaizu d’osíxenu pente los polmones y la sangre. La esposición crónica a les partícules aumenta’l riesgu d’enfermedaes cardiovasculares y respiratories, asina como de cáncanu de polmón.
Ácedu clorhídricu – HCl- Irritante y corrosivu pa cualesquier texíu col que tea contautu. La esposición curtia a baxos niveles produz irritación nel gargüelu.
Compuestos orgánicos volátiles–COV– Cuando se mecen con ósidos de nitróxenu, reacionen pa formar ozonu, que la so presencia en concentraciones elevaes nel aire que respiramos pue producir irritación de güeyos y víes respiratories; astenia, cefalees; alerxes; amenorgamientu de la función polmonar y llesiones al fégadu, reñones, polmones y sistema nerviosu cientral. Los efeutos nel mediu ambiente incluin l’alteración de la función fotosintética nes plantes.
Redaición InfoAsturies
This work is licensed under a Creative Commons Attribution 4.0 International License.
