Consecuencies de la falta d’Oficialidá: El Mercantil impide rexistrar n’asturianu los estatutos d’una empresa si nun apurríen copia n’español, catalán, gallego o euskera

La recién entamada empresa xixonesa “Cuatro Gotes” nun pudo  presentar los sos estatutos nel rexistru mercantil usando la so llingua, requiriéndoseyos una torna a una llingua oficial.

La empresa, Cuatro Gotes Producciones que nos sos estatutos recueye l’asturianu como llingua oficial de la mesma, denuncia esta situación que torga la presencia del asturianu nel ámbetu socioeconómicu. Con esta situación el procesu de normalización da un pasu atrás, ya qu’esisten precedentes dende’l  2.005, cuando si se podía rexistrar una empresa namás n’asturianu.

Iniciativa pol Asturianu, coleutivu que vien denunciando dellos casos de represión llingüística, destaca la importancia del campu empresarial pa normalizar l’asturianu y critica que “les iniciatives que busquen promover l’usu del asturianu nun atopen más que problemes, mesmo cuando se quier etiquetar un productu n’asturianu –como yá se vio nel pasáu con delles empreses a les que’l propiu Gobiernu d’Asturies-yos punxo problemes– o cuando se faen xestiones cola alministración usando l’asturianu –como-y ocurrió a la cooperativa El Nocéu cola Seguridá Social–”. Tanto esti coleutivu como la organización asturiana Andecha Astur insisten no imprescindible de declarar oficial la llingua asturiana pa torgar esta triba de discriminaciones y represiones que se dan lo mesmo nel ámbetu empresarial y asociativu como nel personal.

This work is licensed under a Creative Commons Attribution 4.0 International License.