Con motivu del averamientu a los 50.000 artículos de Wikipedia n’asturianu entámase un Wikialcuentru en Bimenes el díi 29 de xunetu de 2017

Les actividaes —entamaes por Víctor Suárez col apoyu de Wikimedia— tán pensaes pa la comunidá de wikipedistes pero la participación nes mesmes tán abiertes a tol públicu interesáu previa iscripción.

Los participantes averaránse pente les diez y media y les once de la mañana del sábadu a la Casa Conceyu de Martimporra, en Bimenes, onde los recibirán Aitor García Corte (Alcalde de Bimenes) y Víctor Suárez Piñero (Alministrador de Wikipedia n’asturianu y organizador del Wikialcuentru).

Darréu fadráse una escursión pela :Ruta Los Molinos de Bimenes, abierta a tolos públicos, que finará alrodiu les 4:30 pa dar pasu al únicu actu esclusivu pa wikipedistes inscritos: la Wikimaratón sobre la llingua asturiana, que durará alrodiu de 3 hores.

Pa finar la xornada, una Wikifolixa de cellebración con productos de la gastronomía asturiana. Los wikipedistes asistirán de baldre ya’l públicu en xeneral podrá dir previu abonu.

Llucía F. Marqués

This work is licensed under a Creative Commons Attribution 4.0 International License.