El Tribunal Supremu ratifica la sentencia de l’Audiencia Nacional qu’anulaba les midíes unillaterales previes al primer ERE fraudulentu de Lieberbank
Tres de la reclamación interpuesta por Lieberbank a la sentencia de l’Audiencia Nacional qu’anulaba les midíes impuestes unillateralmente pola empresa, primeramente a la firma del primer ERE fraudulentu, el Tribunal Supremu torna a dar la razón a los trabayaores.
Seique fueron delles les causes poles que’l sindicatu CSI solicitó nes estremaes demandes acumulaes la nulidá de les midíes alcordaes pola empresa, toes elles foron refugaes na sentencia recurrida, sacante la relativa a la non aportación mientres el periodu de consultes de les cuentes correspondientes al primer trimestre l’añu 2013, al respeutive de les que la sentencia recueye que “La conclusión nun puede ser otra que la d’entender que la non aportación de les cuentes provisionales del primer trimestre de 2013 constitúi un relevante incumplimientu empresarial, de tal gravedá, que determina la nulidá de les midíes alcordaes unillateralmente pola empresa ”
Na reclamación énte’l TS Lieberbank alegaba qu’estes cuentes foren solicitaes namás pola Corriente Sindical d’Esquierdes
“Nun hai pidimientu de tala documentación por dengún otru sindicatu mientres el periodu de consultes. El sindicatu CSI tien … una representatividá nel conxuntu de la empresa del 3,32%”
El tribunal Supremu dictó qu’una mayor o menor representatividá de quien solicite les cuentes nun esime a la empresa de la so obligación, polo qu’envalora que nun obró de bona fe, ratificando la sentencia que-yos obliga a devolver lo más llueu los 70 millones d’euros que foren descontaos a los trabayaores mientres la vixencia d’esti primer ERE fraudulentu (xunu a avientu de 2013).
Redaición InfoAsturies
This work is licensed under a Creative Commons Attribution 4.0 International License.
