Les instalaciones podríen tar abiertes al públicu enantes de que fine l’añu

Dempués de 30 meses de rehabilitación la ciudá va disponer d’un edificiu “del sieglu XXI”, totalmente accesible, pero calteniendo la esencia de cuando foi inauguráu en 1911. L’emblemáticu espaciu, tresformáu nun centru cultural de proximidá, va tar de xuru en funcionamientu pa les vinientes Navidaes.

Jorge Alonso Nicieza, arquitectu del estudiu d’arquitectura Ruiz Nicieza, que realizó l’asistencia al serviciu d’Arquitectura del Conceyu como collaboradores na redacción y execución d’obra, mientres la visita a les obres por parte d’autoridaes polítiques y axentes sociales, afirmó que les obres van concluyir a entamos del próximu mes d’agostu.

Los nuevos ellementos constructivos tienen un color neutru pa non desentonar nel conxuntu del edificiu. Por exemplu, hai una nueva escalera que sube hasta la tercer planta, asina como dos ascensores, ún de los cualos baxa al suétanu, onde van tar los fondos bibliográficos y d’hemeroteca. Tamién hai otru accesu pola cai la Mercé pa facer más accesible el salón d’actos, pensando en posibles ponentes con movilidá amenorgada.

This work is licensed under a Creative Commons Attribution 4.0 International License.