Los firmantes denuncien con esti documentu la política de xestión del llobu nos montes asturianos por parte del “Principado” que definen como “errática ya irracional”
Los Grupos en Defensa del Llobu d’Asturies entreguen 30.000 firmes nel Rexistru de l’alministración, en refuga de les matances de llobos previstes. Nel Bopa del 9 de xunu espublizóse la resolución que confirmaba una nueva matanza de llobos dientro’l “Programa d’Actuaciones de Control del Llobu 2017/18”, autorizando a matar “un másimu” de 45 exemplares a lo llargo del añu. El testu permite, amás, que fasta’l 40% de los previstos seyan sacrificaos na época de celo y cría, lo que va contra la sentencia xudicial de control de llobos nos Picos d’Europa que prohibe espresamente los controles nestes époques.
El propiu “Principado” reconoz que’l númberu de llobos, acordies al censu, caltiénse estable nos 37 grupos familiares de magar el 2.013 y que los daños al ganao amenorgaron nos caberos años, tanto en cantidá como n’indemnizaciones. Arriendes d’ello, cuéntase con que la recién aprebada midía de suelta de calabres d’animales domésticos nos montes faiga menguar entá más eses cifres.
Reclamen tamién que se revise’l sistema de compensaciones por daños, “que, al mesmu tiempu que desatiende a los coleutivos y profesionales más comprometíos cola ganadería y la conservación de la naturaleza, facilita abusos nel emplegu de los fondos públicos por parte de cazaprimes”.
La solución, insisten, pasa por plantegar un plan consensuáu de control basáu en datos científicos y non na alarma social creada y un plan de manexu más afayaizu del ganao p’amenorgar los daños con midíes preventives.
Llucía F. Marqués
.
This work is licensed under a Creative Commons Attribution 4.0 International License.
