El Tribunal Supremu de Xusticia d’Asturies da la razón al Institutu Internacional de Drechu y Mediu Ambiente (IIDMA) que recurrió l’actualización del permisu de furrulamientu de Soto Ribera por francer, ente otres normes, la Direutiva d’Emisiones Industriales

La sentencia, que sicasí fai casu omisu de les otres dos allegaciones presentaes por IIDMA, obliga al Gobiernu d’Asturies a camudar l’actualización de l’autorización ambiental integrada (AAI) de Sotu Ribera, otorgada en 2015, pa incluyir los valores llende d’emisión -más restrictivos- que recueye l’actual Direutiva d’Emisiones Industriales (DEI). En cumplimientu d’esta sentencia, l’autorización tendrá de ser revisada y en casu de que la central nun s’axuste a un nivel d’emisiones aceptable, retirarásellos el permisu de furrulamientu.

La central térmica de Sotu de Ribera, qu’arrama les sos agües residuales al ríu Nalón, ta allugada nuna zona natural catalogada como d’especial caltenimientu, incluyida na Rede Natura 2000, polo qu’IIDMA tamién solicitó al TSXA que s’incluyirán nel permisu midíes empobinaes a evitar el deterioru de los hábitats, una y bones la contaminación producida por esta central repercute direutamente n’especies como’l salmón. L’Institutu va recurrir la sentencia al ser tornada esta parte la demanda, na que s’esixe que se cumpla la Direutiva d’Hábitats  y la Llei 42/2007 del Patrimoniu Natural y de la Biodiversidá.

IIDMA tamién apurrió pruebes sobro los elevaos índices de mercuriu nos suelos de la contorna de la central de Sotu de Ribera,polo que solicitaba al  TSXA qu’obligara al Gobiernu d’Asturies a incluyir valores llendes d’emisión pa esti contaminante na actualización del permisu de Sotu de Ribera, daqué que’l Tribunal tornó. Les emisiones de partícules de mercuriu xeneren enfermedaes respiratories, cardiovasculares y neurolóxiques.

Redaición InfoAsturies

This work is licensed under a Creative Commons Attribution 4.0 International License.