La Asociación Hierbabuena torna a pidir la reforma del sistema de Salú Mental asturianu
Dende la muerte, el pasáu 24 d’abril, d’una enferma de 26 años amarrada na cama del Área de siquiatría del HUCA, l’Asociación Hierbabuena pola Salú Mental, entidá entamada por persones con diversidá mental ya esperiencia de sufrimientu sicosocial, aconceya na Plaza Escandalera el 24 de cada mes.
Arriendes de pidir información sobre les circustancies de la muerte de la moza y sobre los “métodos de contención mecánica” emplegaos pa la suxeción de los enfermos, reclamen una mayor implicación de los servicios sanitarios pa garantizar una atención segura.
Denuncien la falta d’un modelu d’atención comunitaria de los enfermos mentales, cuya creación se plantego na reforma del sistema siquiátricu que culminare col preslle de la Cadellada, pero qu’entá nun ye una realidá. “De fechu, a díi de güei, alcontrámonos más bien con un modelu de contención, el tratamientu únicu actual resignase a contener y pocu más, a reprimir síntomes y someter conciencies mediante l’escesu d’atadures ya l’acosu farmamentísticu, que nun tien en cuenta a les persones nin a la comunidá.”
Nel so escritu, dirixíu a la Conseyería de Salú, desixen el desendolcu d’un Plan Estratéxicu integral de Salú Mental, con espacios habitables onde nun seya preciso amarrar a naide y personal especializáu y cualificáu que trate a los enfermos “con humanidá, dignidá y respetu”.
Llucía F. Marqués
This work is licensed under a Creative Commons Attribution 4.0 International License.
