Delles militantes lleerán mañana  comunicaos sopelexando’l so compromisu cola llucha  escontra los abusos que carecen les muyeres en tol mundiu

Como ya fizo l’añu pasáu, el TJA (Movimientu de Muyeres Llibres del Kurdistán) y la Plataforma de Llucha poles Muyeres  Prindaes pela Fuercia fai un llamamientu a celebrar un “díi Internacional d’Aición escontra’l Femicidiu ya’l Xenocidiu” coincidiendo col tercer cabudañu de la campaña de Sinjar. Piden a les muyeres de tol  mundiu que llean una declaración al respeutu y caltengan, simultaneamente, un menutu de silenciu a les once de la mañana d’esi díi.

El tres d’agostu de 2014 ISIS atacó Sinjar/Shengal y masacró más de 5.000 persones Yazidi.  Alrodiu d’otros 200.000 foron quien a escapar, pero ISIS capturó a 3.000 muyeres que siguen entá nes sos manes, y continúen garrando  preses práuticamente a diario.

Anguañu podemos celebrar la lliberación de Sinjar, que recuperó la so soberanía. Non asina les sos muyeres y la llucha del TJA y del exércitu kurdu –compuestu en bona parte por muyeres-  continuará fasta que seyan quien a lliberales, a elles y al so pueblu.

La so propuesta ye qu’esi díi se torne un díi internacional d’aición común y llucha escontra’l femicidiu, “una llacra qu’afeuta a la totalidá de los países, a toles  cultures y a tolos niveles sociales, dexando miles d’asesinatos impunes cada añu” como recueye’l comunicáu que lleerán les muyeres d’Andecha “Les kurdes son un exemplu a siguir pa les muyeres del mundiu, ya que son elles les cabezaleres na llucha pola llibertá, la propia y la del so pueblu.”

This work is licensed under a Creative Commons Attribution 4.0 International License.