La ueb del Gobiernu d’Asturies recoyó en Xixón un incrementu puntual de la contaminación por partícules del 2.100%
Les estaciones publiques midiores de los niveles de contaminación recoyeron en Xixón a lo llargo la tardi d’ayeri unes concentraciones en micropartícules PM2,5, -les más peligroses pa la salú- que superen toles rexistraes fasta agora, ensin que fasta l’intre se tenga conocencia del orixe de tala polución.
Los picos algamaron alrodiu les ocho de la tardi los 221 µg/m3 en PM2,5 na estación de Roces, partiendo d’un valor anicial de 10 µg/m3. El valor d’alerta pa esta triba de partícules ye precisamente de diez, colo que ya anantes de la brutal subida les midiciones taben na mesma llende de lo aceutable pal ser humanu, acordies les recomendaciones de la Organización Mundial de la Salú, sobrepasándose tamién de manera bultable les másimes permites pola llexislación asturiana, que permite una llende de 25 µg/m.
Na mesma estación algamáronse picos de 263 µg/m3 en partícules de menos de 10 micres, PM10 partiendo de 29 µg/m3, unos valores escesivos, considerando que la llende llegal pa los mesmos ta nos 50 microgramos por metru cúbicu.
Dulce Xil, responsable de la estaya de sanidá d’Andecha Astur, alvierte de los pelligros qu’estos datos impliquen pa los enfermos respiratorios “Tamos careciendo un progresivu empeoramientu de la calidá del aire n’Asturies, demientres les instituciones publiques siguin anteponiendo los porgüeyos económicos a la calidá de vida de les presones, poniendo en pelligru la salú de la población cola so falta d’actuación. Nun escaezamos que tamos cabezaleros en casos de cáncanu de polmón.”
La escasez de datos públicos derivada del fechu de que nun se faciliten los datos de les estaciones de control del Musel nin de les estaciones privaes monitorizaes fai abegoso reconocer la causa d’estos xorrecimientos y prevenilos.
A díe de güei los picos de contaminación por partícules en Xixón nun tan estabilizaos, seique los niveles son muncho menos alarmantes.
Pa más información so los efeutos de la contaminación na salú, visitar www.infoasturies.com/as/2017/02/02/piquena-guia-de-contaminantes-atmosfericos/
This work is licensed under a Creative Commons Attribution 4.0 International License.
