Pero retira esa categoría a seis ONG que trabayen a favor de los desfavorecíos o escontra la droga
La organización Hazte Oír va siguir gociando de los privilexos fiscales, como la exención del pagu del IBI o l’Impuestu sobro Actividaes Económiques, que-y concede’l tar declarada como d’utilidá pública. El Gobiernu español, qu’anunció hai unos meses una revisión del so estatus, considera agora que “na actualidá nun esisten ellementos pa revisar la condición d’utilidá pública d’esta asociación”.
Hazte Oír foi declarada entidá d’utilidá pública en mayu de 2013, pol Gobiernu de Mariano Rajoy.
El lobby adquirió especial proyección pública, en febreru, cola so campaña n’autobús escontra los neños tresnsexuales, en reacción a una campaña a favor de la diversidá sexual empobinada por Chrysalis Euskal Herria.
El plenu del Congresu, colos votos de PSOE, Unidos Podemos, Ciudadanos y ERC, en marzu, pidió al Gobiernu que revocara la declaración d’utilidá pública poles sos actividaes “abierta y radicalmente contraries a los valores, fines y principios que xustifiquen la declaración d’interés xeneral d’una asociación y, en concretu, a los de promoción de los valores constitucionales, de los drechos humanos, de la familia, de la infancia y de la igualdá d’oportunidaes y de la tolerancia”.
Esti branu Hazte Oír, cuyes vinculaciones cola sociedá paramilitar El Yunque nun tendríen de pasar desapercibíes, vuelve ser noticia col lema “Van a por tus hijos” nuna nueva campaña protagonizada por una avioneta.
This work is licensed under a Creative Commons Attribution 4.0 International License.
