El supuestu pronunciamientu militar taba dirixíu pol excapitán Juan Caguaripano

El domingu Venezuela volvió ser noticia por un vídeu nel que 15 persones con uniforme militar y portando armes llargues se declaraben en rebeldía contra’l gobiernu de Nicolás Maduro. Al mandu de la supuesta rebelión militar figuraba Juan Carlos Caguaripano Scott, autonomáu “Comandante de la operación David Carabobo”, que llamaba a tolos militares del país a incorporase al so golpe d’estáu.

La mayoría de los medios de comunicación internacionales lo nomaron “alzamientu” y “sublevación militar”, lo cual nun ta nada nidio pol amenorgáu númberu de persones qu’asaltaron el fuerte de Paramacay. N’efectu, dellos individuos armaos intentaron tomar el cuartel, col resultáu de dos muertos y diez deteníos nel asaltu.

Sicasí, un comunicáu de la Fuercia Armada Nacional Bolivariana falaba d’un “ataque terrorista de tipu paramilitar” y esplicaba que “los suxetos prindaos confesaron ser contrataos nos estaos Zulia, Lara y Yaracuy por activistes de la estrema derecha venezolana en conexón con gobiernos estranxeros”. Concluyíen asegurando que namás yeren “delincuentes civiles portando priendas militares” y que ente los deteníos namás hai un “teniente en situación de deserción”.

This work is licensed under a Creative Commons Attribution 4.0 International License.