Los alumnos de los talleres d’Improvisación demostraron cuantu puede faese nuna selmana de música, interpretando los cantares qu’ellos mesmos compunxeron mientres el taller

Con esta cumplen cinco ediciones de la Selmana del Jazz de Candás, qu’incluyó’l mesmu Festival, con dellos conciertos, conferencies, esposiciones y esti cursu d’improvisación.

Tres una selmana musicalmente intensa, los casi cuarenta participantes de los talleres d’Improvisación actuaron nun conciertu nel local de la CNT, una y bones la climatoloxía ástur torgó l’usu del escenariu central, na Plaza del Bocata.

Xusto antes de la clausura de la Selmana del Jazz de Candás les formaciones nacíes de los talleres, con miembros de toles edaes (a partir de seis y hasta los más “senior”) y bien distintes procedencies de dientro y fora del país, ablucaron al públicu asistente col nivel algamáu en tan pocu tiempu: una sola selmana foi abonda pa crear, interpretar, coordinar y ensayar.

Llucía F. Marqués

This work is licensed under a Creative Commons Attribution 4.0 International License.