Un defeutu na cadarma’l coleutor lleva provocando numberosos arramaos ensin que’l Conceyu lu repare

La Confederación Hidrográfica del Cantábricu volvió sancionar al Conceyu de Corvera polos arramaos al rió Arlos, en comprobando que suponíen daños al dominiu públicu hidráulicu tipificaos na Llei d’Agües, según daños producíos nel calce y la so fauna y flora. La sanción ye proporcional al calter contaminante del derrame y aumentaría si’l Conceyu reincidiera na so neglixencia, una y bones la frecuencia ya intensidá de los arramaos que careció’l ríu a lo llargo de munchos años enzanca descomanadamente la so recuperación.

La suciedá procede del coleutor municipal allugáu a altor  de les Vegues, onde cada vegada que llueve fuerte prodúcense arramaos d’agües fecales por cuenta d’un erru de construcción del mesmu, responsabilidá del Conceyu de Corvera.

Al ser el ríu Arlo un afluente de la ría d’Avilés, estos episodios contaminantes xunense a los continuos arramaos que lleguen a la ría al traviés de los distintos afluentes qu’acaben nella.

Redaición InfoAsturies

This work is licensed under a Creative Commons Attribution 4.0 International License.