La fienda salarial xube más de cuatro puntos, mientres el desemplegu, la temporalidá ya’l trabayu en prieto afeuten más a les muyeres qu’a los homes

La Estratexa Asturiana contra la Fienda Salarial, puesta en marcha pol Gobiernu del “Principado”, nun paez tar teniendo bonos resultaos: nuna década les muyeres pasaron de cobrar un 24,1% menos que los homes a cobrar 28,6% menos.

Esto traduzse nuna media d’alredor de 7.500 euros de diferencia añal ente los salarios d’un asturianu y una asturiana. Disparidá que xorrez cola edá, una muyer de más de 45 años, amás de tenelo bien difícil pa consiguir trabayu, va cobrar más de 8.000 € menos que los sos compañeros.

Les muyeres tamién siguen siendo les qu’ocupen la mayoría de puestos llaborales “en precariu”, ello ye, temporales, a tiempu parcial y/o que tán per debaxo del estragal del ‘mileurismu’. Na escala salarial más alta, con un salariu mediu de 135.796 euros al añu, hai namás un 19% de muyeres, ocho de cada diez d’estos puestos de trabayu meyor remuneraos tán ocupaos por homes. El  89% de les asturianes que coticen faenlo nel inestable sector servicios.

Nel ámbitu de los trabayos “en prieto” atopamos con miles de muyeres –sobremanera nel sector de la llimpieza y el curiáu de persones- trabayando ensin cotizar ya en condiciones bien perbaxo lo llegal.

De resultes d’esta situación, les xubilaciones que van percibir nel futuru van ser bien inferiores a les de los sos compañeros masculinos. Ello ye que no qu’a pensión se refier, la fienda salarial avérase peligrosamente a los 9.000 euros.

El pocu alendaor cuadru pintáu con estos datos arredondiase con una fecha: envalórase que pa que les asturianes algamemos la igualdá salarial falten alrodiu de 170 años.

Llucía F. Marqués

This work is licensed under a Creative Commons Attribution 4.0 International License.