Si bien nun encara direutamente la reparación de les costruciones tradicionales nin afronta los gastos derivaos de les mesmes, al menos los propietarios malpenes tendrán que pagar la llicencia d’obres cuando quieran reparales
Nel conceyu de Parres, conocíu pola so bayura padrimonial, vien d’aprebáse una exemplar bonificación que cubrirá fasta’l 95% les llicencies d’obra pa fomentar la igua d’horros, paneres, molinos y otres costruciones d’arquitectura del país, eliminando asina una de les torgues coles que s’alcuentren los propietarios d’elles a la hora de facer una reparación.
Cuasi sesenta molinos y alredor de cuatrocientos horros, dalgunos d’ellos con decoraciones de gran interés etnográficu, como los de Llerandi y Aballe, conformen el cuerpu principal de lo que ye un conxuntu arquitectónicu padrimonial del qu’en Parres tan orgullosos. Na Casa Conceyu confíen en qu’esta midía facilitará la so proteición, afalando les reparaciones al lliberar a los sos propietarios d’una carga.
Amás del padrimoniu históricu, l’amenorgamientu de preciu nes llicencies d’obra algama a . les viviendes con dalgún tipu de proteición social, con reducción del 50% nes llicencies pa cualisquier obra o istalación.
Redaición InfoAsturies
This work is licensed under a Creative Commons Attribution 4.0 International License.
