El llíder de los kurdos del norte d’Iraq reclama’l sofitu de los cristianos de la Enllanada del Nínive

Agora que la nación del Kurdistán «ta caminando escontra la independencia, les esixencies y los derechos de los hermanos y hermanes cristianes nel Kurdistán van ser protexíos a tolos niveles y asina la fraternidá y la convivencia equí van ser más sólidos». Con estes pallabres Masud Barzani, presidente de la Rexón Autónoma del Kurdistán iraquín, decidió dirixise a toles comunidaes cristianes hestóricamente asitiaes na fastera septentrional del actual Iraq, buscando’l so sofitu para proclamar la independencia del Kurdistán, con motivu del referéndum convocáu para’l viniente 25 de setiembre.

Esti mensaxe foi llanzando con motivu del 84º aniversariu de les masacres realizaes en 1933 polos soldaos del entós Reinu d’Iraq contra los miembros de les Ilesies cristianes autóctones (caldeos, armenios y asirios), que yeren sospechosos de secesionismu pal Gobiernu de Bagdad. Estes mesmes comunidaes relixoses foron tamién víctimes, nestos caberos trés años, de los yihadistes del Estáu Islámicu. Por eso Barzini proclama que «la única melicina pa tolos nuesos dolores y la única garantía pa afitar que los desastres nun se repitan ye caminar escontra la independencia».

This work is licensed under a Creative Commons Attribution 4.0 International License.