“L’enemigu ta dientro, Disparái sobre nós”, la cellebre frase unviada al bombarderu Cervera mientres l’asediu al Cuartel de Simancas en grandes lletres de neón ye pal “Principado” una obra d’arte
¿Daquién ye a imaxínase una esposición d’arte que representara al gobiernu alemán nuna feria internacional y na que pudiera lleese nun gran rétulu una de les más famoses frases de los lleales al führer? ¿Imaxínense les reacciones? L’equivalente a esi escenariu podemos atopalu nel Pabellón del “Principado” na Feria Internacional de Muestres d’Asturies.
L’amuesa ‘Principado de Asturias, Principado de Arte’, que representa al “Principado” nesta edición de la feria, cuenta con una escoyeta d’obres proveniente de cinco museos: Muséu de Belles Artes d’Asturies, Muséu Barjola, Sala Borrón, Centru Cultural Internacional Niemeyer y Llaboral Centru d’Arte y Creación Industrial. Pente elles podemos atopar, nuna de les zones nes que se desendolquen talleres pa la reciella y asitiada sobre una gran vidrera, la frase que supuestamente foi unviada al Cervera -que coles mesmes bombardeaba la población de Xixón- mientres el sitiu al cuartel de Simancas. Considerada una amuesa del valor de los rebeldes franquistes, la frase tien una emportante connotación hestórica a la que ye imposible que l’autor de la obra, Avelino Salas, fora ayenu.
Estos díes cúmplese precisamente l’ochenta aniversariu d’esa efemérides, cuidao que’l sitiu al cuartel remató’l 21 d’agostu del 1936, esautamente 80 años antes de la fecha de finalización d’esta edición de la feria.
Llucía F.Marqués
This work is licensed under a Creative Commons Attribution 4.0 International License.
