Tres de les polemiques alrodiu’l llobu, la so caza y les práutiques abusives por parte de dalgunos ganaeros foron munchos los que demandaron que se recoyera’l puntu de vista de los que curien del ganao. Poro, entrevistamos a Germán Concheso, presidente d’ACPRA

L’Asociación de Criadores de ponis de Raza Asturcón, ACPRA ye una asociación de criadores de la raza asturcón, comprometíos en xestionar y velar pola pervivencia de la raza.  Germán Concheso, fai un llamamientu al sentíu común  y a la defensa del asturcón y de les formes tradicionales de vida asturianes.

¿Qué opines de les recientes  declaraciones del Xurde Gayol sobre la polémica de los llobos?

Les d’esti señor foron declaraciones nada afortunaes. Si tien constancia de qu’hai un delitu, la so obligación ye denuncialo y perseguilo, como funcionariu que ye. Fala de delitos mui graves, como dexar que’lllobu mate a los potros a costafecha, eso perxudicanos a toos ; y cuando fala faelo con munchos datos, paez que ye mui conocedor d’eses prautiques de les que fala, asina que lo denuncie. N’ACPRA nun vamos dar apoyu a quien s’aprofite d’esta triba de picaresca, pero tampoco ye xusto metenos a toos nel mesmu sacu.

¿Pero la picaresca que denuncia ye cierta?

Nosotros tenemos pidíos a l’alministración datos que mos permitan valorar si efeutivamente hai esta triba de picaresca. Escúchense histories de ganaeros mui concretos de los que paez que nun cuadra la proporción pente’l númberu de yegües y los daños de potru mientres nun tea los papeles nun puedo facer una valoración.

Los daños de llobu tienen de tar certificaos por un espertu y no que cinca  a los asturcones, solo ACPRA puede certificar qu’un animal ye efeutivamente un asturcón.

Entós  ¿tais a favor o a la escontra del llobu?

Too tien cabida, na so xusta midía, nun queremos acabar col llobu, pero si que ye necesariu un control, siempre lu hubo, anantes había alimañeros que cobraben por matalos ensin restricciones, tamos falando d’entamos del sieglu pasáu y non por eso s’estinguió’l llobu, muncho menos diba estinguise aplicando una política de control seria y razonable, basada nel sentíu común. Lo que nos topamos ye con qu’hai llobos, munchos llobos, un gran depredaor al que dengún otru animal, más que’l ser humanu, controla. Sicasí, l’alministración nun quier facer nada, col tema del llobu, hai un descontrol terrible y que lo paguen son los ganaeros. Hai daños en Les Regueres, en Llangréu… daños al pie de les cases, onde nunca los hubo.

Entendemos que’l llobu ya l’osu nun tean que desapaecer d’Asturies, pero nosotros trabayamos tamién con una raza en peligru d’estincion, y nun lo facemos por perres, sinón por salvar daqué que ye nueso, ¿Por qué ye menos importante  un asturcón qu’un osu? Hai que concienciase de qu’estos animales son padrimoniu asturianu, despreciándolos tamos tirando la cultura nuestra, tamos faciendo desapaecer los pueblos.

L’asturcón ye una raza que nun  la quier naide, n’Asturies lo que ye d’equí valorase menos, nun ye rentable, nun son caballos grandes… pero dame igual, yo quiérolo ruino, por que ye lo de nueso. Si no valoramos mas lo nueso que lo de los demás, mal vamos.

Pido a la xente más empatía colos ganaderos y mas colos que trabayamos con races en peliguru, que nun lo facemos  por renta, sinón por convicción.

Muncha xente diz qu’estos ataques podríen evitase con midies preventives

Poner el tipu de preslle pa que nun entre’l llobu seria costosísimo, y nun podemos guardar los caballos tolos díes, nun ye factible, fasta llegalmente la direutiva europea diz qu’ una ganadería n’estensivo tien que tar nel monte o sanciónente, nun podemos recoyelo. Los herbívoros son importantes pal mediu ambiente, controlen la yerba escontra los incendios…

¿Y los perros pastores?¿Por que quieren sacalos de los montes?

Ponen el turismu per delantre de les formes de vida de tola vida, nun quieren que tengamos perros en monte por si ataquen o asusten a un visitante… ye too asina.

El problema ta en que quien decide toes estes coses nun vive nel campu, les decisiones tómense nes ciudaes y como la xente de los pueblos son una minoría nun tenemos poder… les coses del campo y la ganadería deberíen decidise polos ganaeros.

¿Qué proponeis vosotros?

Hai una fauna silvestre qu’ hai que controlar. Si pa ello hai que contratar más guardies, pues contratase. Si ye necesario facer captures faense; lo que no puede ser ye esti descontrol qu’hai, los pueblos queden sin recursos, despóblense, pente les multes, perdides d’animales, la xente hipotécase y ye la ruina. N’Asturies a llargu plazu lo que queda ye’l campu, la mina acabose ¿Qué vamos, vivir toos de museos?

Hai ganaderos que quieren convivir col llobu y otros que non, ye prioritario establecer zones , tener un plan seriu d’actuación de llobos y alcordar indemnizaciones en condiciones, que cubran  non solo lo que val l’animal, sinón el so potencial. Seique n’ocasiones, por muncho que te paguen daños nun compensa, cuando muerre una yegua estraordinaria xenéticamente, frutu d’años de trabayu y escoyeta, con tol potencial que tien pa la recuperación de la raza, eso nun se paga con dineru.

Redaición InfoAsturies

This work is licensed under a Creative Commons Attribution 4.0 International License.