Los alrodiu de 260 exemplares oficialmente censaos nel caberu recuentu allonxen de la Cordalera Cantábrica la solombra d’estinción

La mayoría de los cerca de 260 osos controlaos, pente 190 y 220, alcuéntrense na subpoblación occidental , demientres que nel oriente son 40 los exemplares rexistraos De los datos recoyíos de magar el dos mil puede deducise un esperanzaor espoxigue que fai albidrar la consolidación de la población osera n’Asturies. De caltenese los datos actuales, con 40  oses n’edá de cría frente a les diez contabilizaes va diecisiete años, la menacia de desapaición del osu pardu de los nuesos montes va allonxándose, lo que nun quier dicir que’l peligru tea descartáu dafechu nin que se tengan qu’abandonar les midies de proteición d’esti emblemáticu animal.

Esti espoxigue tien les sos consecuencies no que cinca a la convivencia humana, siendo ca vegada más avezaos los avistamientos nes cercaníes de les poblaciones, especialmente en Cangas del Narcea, Degaña, Ibias, Belmonte, Somiéu, Tinéu, Quirós, Teverga, Proaza, Santu Adriano, L.lena y Ayer, faciendo temer a los ganaeros pola seguridá del so ganao. Agora ye responsabilidá del “Principado”  tomar midíes darréu que permitan la convivencia pente osos y humanos ensin qu’esta bona noticia tea de convertise nuna esmolición más pa los qu’intenten siguir viviendo nes fasteres rurales.

Fasta agora lo que fizo’l Principado –en colaboración cola Fundación Oso Asturies foi ellaborar un llistáu de recomendaciones sobre como comportarse casu de topar con un osu en llibertá, seique los ganaeros ven dalgunes incompatibles col desendolcu del so trabayu, como la de dir en grupos pel monte o dar la vuelta pa casa cuando ves un osu. En tou casu, recomiéndase la llectura d’esta guía a los que quieran pasiar pelos montes asturianos ya en casu d’avistamientu caltener siempres la calma.

Llucía F. Marqués

This work is licensed under a Creative Commons Attribution 4.0 International License.